Kuultisiorfik Nalunaq kingumut soqutigineqaqqilerspoq
Ingerlatseqatigiiffiit arlallit soqutiginnissimapput, ingerlatseqatigiiffimmillu aalajangersimasumik oqaloqateqarnerit maanna ingerlapput, soqutiginninnerilli piviusunngorsinnaanersut oqaatiginissaannut suli piffissanngunngitsoq erseqqissaatigaa.
Aatsitassarsioqatigiiffillumi Angus & Ross, Tuluit Nunaanni inissisimaffeqartoq, tusagassiutinut nalunaarpoq aatsitassarsiornissamut akuersissutit kuultisiorfimmilu atortuutit pisiarinissaannut pituttuisuunngikkallartumik kuultisiorfimmik piginnittunut Crew Gold Corporationimik isumaqatigiissuteqarsimallutik.
Pilersaarutit piviusunngussappata Angus & Rossikkut pilersaarutigaat kuultip qaarsumiit avissaartinnissaa nunani allani suliarinagu Kalaallit Nunaanni suliarineqartassasoq, tassa immaqa kuultisiorfiup eqqaani - assartuinermut akissaajaatit taamaalillutik ikilisarniarlugit.
Aatsitassarsiornermi Pisortaqarfiup erseqqissaatigaa kuultisiorfiup ammaqqinneqannginnerani allaffissornikkut, aningaasarsiornikkut naalakkersuinikkullu nalilersugassat arlalissuit peqqaartariaqartut.
Tassami aatsitassanik piiaasoqalinnginerani, aammalu akuersissutinik allanut nioqquteqartoqannginnerani, Kalaallit Nunaanni Aatsitassat Ikummatissallu pillugit siunnersuisoqatigiinnit akuerineqaqqaartussaapput, kingornalu Nunatsinni Naalakkersuinit danskillu Naalakkersuisuinit akuerineqaqqaartariaqartussaallutik.
Kiisalu kuultisiorfimmik pisiniartut kuultisiorfimmi atortut naleqassusaannik naliliiniaqqaartussaapput.
Taamaammat qanorpiaq pisoqarnissaa qaammatit arlallit ingerlareerpata aatsaat erseqqississagunarpoq.
Kuultip nunarsuarmi akii nikerartorsuunngillat maannakkullu kuulti ouncemut 895 dollarinik akeqarpoq. Ounce ataaseq 31 gramminik oqimaassuseqarpoq.
