Kuultisiorfik matuneqaratarsinnaavoq
Taama tusarfinnit qitiusunit arlalinnit AG-mit oqaloqatigineqartunit oqaatigineqarpoq, sapaatip akunnerani kingullermi NunaMineralsip Crew Gold Corporationimi maanna ingerlatseqatigiiffimmi ataatsimoorussaasimasumi Nalunaq Gold Minemi piginneqataassutinik tamanik pigisaqalersumi.
- NunaMineralsip niueruteqarluarsimanera isertuutissanngilara. Isumaga malillugu kuultisiorfiup ukioq ataaseq qaangiuppat ingerlaqqissinnaajunnaarnissaanut aarleqquteqarneq piviusuuvoq. Taamalu pisoqassaaq ikiariissiternerni nutaani kuultip akugissusia ullumikkornit qaffasinnerunngippat, NunaMineralsimi siulittaasoq Anton Christoffersen aviisimut oqarpoq.
Jan A. Vestrumip Crew Cold Corporationimi pisortap siunissaq allatorluinnaq isigaa. Taanna isumaqarpoq Kujataani kuultisiorneq suli ukiuni arfineq marlunni arfineq pingasuniluunniit ingerlaqqinnissamut tunngavissaqartoq.
- Aallartisarnermi ajornartorsiuteqartoqarsimavoq. Tamakkuli maanna qaangersimalerpavut. Ukioq manna siusinnerusukkut ullormut 500 tonsinut qaffapparput. Naammassisaqarsinnaanerulernitsigut 2007-imi sinneqartooruteqarnissarput naatsorsuutigaarput, Jan A. Vestrum AG-mut oqarpoq.
