Kuultip akiata qaffasinnera ujarlerumalersitsisinnaavoq
Kuultip akia ukiuni kingullerni 16-ini aatsaat taama qaffasitsigaaq, aatsitassarsiorfiutilinnilu isumalluarneqalerpoq. Akit qaffasinnerini nunatsinni aatsitassanik ujarlernissaq pilerinarnerulerpoq.
Nunarsuaq tamakkerlugu kuultinik tuniniaanermi akigititaq ullaaq grammimut 82 kr.-nngorsimavoq, 1988-imili kingumut taama qaffasitsigaluni, ukiormannalu septemberimiit kuultip akia qaffakkiartulerami maannamut aki taama qaffasitsigilerpoq.
Kuultip akiata qaffannera tuniniaasartuinnaat itummamikkut ungilaatiginngilaat, nunatsinnullu sunniuteqartussaavoq, kuultimmi tuniniarnerani akit qaffannerata nunatsinni kuultimik ujarlerneq pilerinarninngortissagaa, NunaMineralsimi pisortap Ole Christiansen oqarpoq.
- Kuultip akiata qaffasinnera aatsitassarsiorfiutillit iluanaarneruutigalutik ujarlernissaminnut aningaasaliinissanut qununnginnerulerput. Maannami piffissanngorpoq kuultip akiata qaffasinnerani nutaanik nassaarniarnissamut, Ole Christiansen oqarpoq. Erseqqissaatigaali nassaartoqareeraluartoq naatsorsuutigisariaqartoq ukiut arlalissuit aatsaat qaangiuppata piiaanermi tuniniaasalernissat piviusunngorsinnaassasut.
Assersuutigaalu Nuup iluani Qeqertarsuarmi kuulteqarfimmit piiaanissaq, siornaannguaannaq kuultimik nassaarfigineqartoq. Qeqertarsuarmi nassaat Australiami Canadamilu nassaanut missingissersuunneqartut annertupput, ukiulli arlalissuit aatsaat qaangiuppata piiaanerit aallartinneqarsinnaassasut Ole Christiansenip oqaatigaa.
- Nalunami kuultimik nassaarnerup kingorna aatsaat ukiut aqqaneq marluk qaangiuttullu piiaaneqalerpoq. Suliaq annertuvoq, ikittuinnaappullu misissuinernik piiaanernillu aallussisinnaasut. Marsillu qaammataani Canadami USA-milu piiaasinnaasunik ataatsimeeqateqassanerarput, Ole Christiansenillu naatsorsuutigineqarpaa ukiut marluk ingerlanerini suleqatissarsisoqarsinnaassasoq.
NunaMineralsimi pappiaqqatigut piginneqataassutinik maannakkumit pisisoqarsinnaalerpoq, piginneqatigiiffiullu piginneqataassutit 12 million koruuninik annertusarniarpaa, sisamanngorpamillu aallartittumik sapaatip-akunneri pingasut tulliit pisiarineqarsinnaassallutik. Maannamut piginneqataassuteqareersut salliutinneqarput, neriuutigineqarporlu inuinnaat soraarnerussutissaminnut ileqqaakkatik piginneqataassutinik pisissutigiumaaraat.
