Kuultinik tunisassiorneq unitsinneqassaaq

Nalunami kuultisiorfiup, Nanortallip eqqaani inissisimasup 25-nillu sulisoqartup, kuultimik tunisassiornini ukiortaartinnagu unitsissavaa. Piginneqatigiiffik aalajangersimavoq, atortut aserfallatsaalinissaannut sulisoqaannassallutik, taamaalilluni kingusinnerusukkut tunisassiorneq aallarteqqinneqarsinnaaniassammat.
Allattoq Louise M. Kleemann
novembarip 10-at 2008 12:10

Nalunaq Gold Minemik piginnittut, piginneqatigiiffissuaq kuultisiornermik kuultimillu piiarnermik nunani tamalaani suliaqartoq, Crew Gold Corporation, Oslomi aningaasanik pigisanillu nalilinnik tuniniaavimmut nalunaaruteqarpoq.

Putorsuit kuultimik maanna piiaaffiusut, naatsorsuutigisamik minnermik kuulteqartut paasinarsisimasoq, Nalunaq Gold Mine ilisimatitsisimavoq. Aamma nunani tamalaani aningaasaqarnikkut ajornartorsiorneq tamatumani sunniuteqarpoq. Tassami kuultimik tunisassiornermi aningaasartuutit tuniniaanermik isertitanit piffissami kingullermi annerusimapput.

Kuulitimik unsimik ataatsimik – imaluunniit 30 grammit pallillugit tunisassiornermi 937 dollarit aningaasartuutigineqartarsimapput, uffa kuulti unsi ataaseq tuniniaraagamikku 857 dollarinik taamaallaat pissarsisarsimallutik.

Assartuinermi aningaasartuutit immikkut qaffakkiartorsimapput, tassa uuliap akia ukiuni kingullerni qaffakkiartormat.

Kisianni Crew Gold Corporationip erseqqissarpaa, Nalunami suli kuulteqartoq. Taamaammat allanik suleqatissarsiorlutik aallartissimapput.

Piginneqatigiiffiup suleqatissat, nunani tamalaani tuniniaanermik pikkoriffillit, suleqatigissallutik immikkut soqutigaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq