Kuulti kanngussallu Qussummi
Nuup Kangerluani Qussuup ilaani Innarsuarmi kuultip kanngussaallu qallorneqarsinnaalernissaat periarfissaqarnersoq ujarassiuunit misissuiffigineqaleruttorpoq. Silaannarmiit nunap aatsitassaqarneranik misissuutip aatsitassaqarsinnaanera ilimanarsitimmagu takuniaasoqarsimavoq. Kuultilu nunap qaani ersiinnaq, qanoq ititigisumi aamma nassaassaanersoq paasiniarlugu, qillerut kangerluup ilaani Qeqertarsuarmi kuultimik qillerivimmi manna atorneqartoq Innarsuarmut aggustimi nuunneqassasoq, NunaMineralsimi pisortaq Ole Christiansen oqarpoq.
- Tassa uani nunaminertami Qussummik taasartakkatsinni, nunaminertami isorartugaartorujussuarmi 20 kilometeriusup iluani ukiuni kingullerni misissuinikuuvugut, taavalu ukioq manna, qanittukkuit helikopterimik ikiorteqarluta geofysik-imik – nunap pissusaanik uuttortaanermik ingerlatsisimagut, nunap iluani aatsitassaqarsinnaanersoq misissorlugu, Ole Christiansen aallartippoq.
Misissukkat inerneri malillugit peqarfeqarsinnaammat nunaminertaq aggustip ingerlanerani sukumiinerusumik misissuiffiginiarneqarpoq. Nunap qaavani misissuinikkut qillerinikkullu.
-Qillerineq Qeqertarsuarmi Storø-mi ullumikkut ingerlanneqarpoq, taannalu naammasseriarpat qillerut atorneqartoq Qussuup kangerluata kangiatungaanut Innarsuup qulaanut nuunneqassaaq, nunami qutsissumi qillerutigineqassalluni, NunaMineralsip pisortaa nangippoq.
Misissuinerillu sapaatip-akunnerini marlussunni ingerlanneqassapput.
Qussuk eqalunniarfittut aavartarfittullu ilisimaneqarpoq. Akornutaassanerlunimi?
- Takusinnaasakka malillugit eqalunniarfittaa avartarfittaalu Innarsuup qatsissortaanut ungasingaatsiarpoq. Taamaattumik neriuppunga aavartoqassappat eqalunniartoqassappalluunniit akunutaassanngitsugut. Eqalunniarfimmummi immaqa kilometerit qulit aqqaneq-marluk missarivaat, akivoq.
Kuulti kanngussallu nunaminertami qanoq annertutiginersoq suli nalunarpoq. Kuultili nunap qaani ersiinnartoq takuneqarsinnaasimavoq.
- Ungasinngitsukkut nunap pissusaanik uuttortaanermi inernerisat malillugit nunami nuisaffiusinnaasut alakkarteratsigit kuultimik ersiinnartunik nassaarpugut, suu, Ole Christiansen nassuiaavoq, nangillunilu.
- Isumalluarnarnersoq oqaatigiuminaatsorujussuuvoq, aatsaavissuaq kuultimik ersiinnartunik taqqamani nassaaratta. Misissuinerit takutikkumaarpaat qanoq siunissaqartiginersoq. Taannartaa suli nalunarpoq.
Ole Christiansen aamma oqarpoq, Qussuup pulammagiaani Innarsuarmi 770 meterisut portutigisumi, 700 meeterisut qatsitsigisumi qillerinerup saniatigut nuna 1.500 meterisut annertutigisoq misissuiffigineqassasoq.
