Kuujjuarmi kiasiortut

Quebec-ip avannarpasissortaani inuit, aasaq manna kiarujussuarnera pissutigalugu, silaannarissaatinik, aamma nillalaarsaatinik taaneqartartunik, assut atorfissaqartitsisimapput.

Kuujjuarmi, 2.000-inik inulimmi, juulip naajartornerani 31-nik kiassimavoq. Allaffimmiunik 25-nik sulisoqarfiusumut silaannarissaatinik qulinik illoqarfimmi aqutsisut ikkussuisariaqarsimapput.

Alaskami, Canadami, Kalaallit Nunaanni Ruslandimilu inunnik 155.000-inik ICC sinniisuutitaqarpoq, silaannaap kissatsikkiartornerujussuanut atatillugu USA-p suliniuteqanngippallaarnera pissutaalluinnartoq ICC-p qularutiginngilluinnarpaa.

Inuit pisinnaatitaaffiinut Ataatsimiititaliarsuarmut, Washingtonimi angerlarsimaffeqartumut, USA ICC-p siornali naammagittaalliutigigaluarpaa.

- Silaannaap allanngoriartornerata avatangiiserput aserulerpaa kulturerpullu katatsilerlugu. Piniartarnerput issittumut naleqqussagaavoq, ICC-p præsidenterisimasaa Sheila Watt-Cloutier naammagittaalliuummini oqarpoq.