Kurmanbek Bakijev Kirgistanimi præsidentinngoqqippoq

Asiap ilaani Kirgistanimi præsidentimut ullumi qinersisoqarmat maannamut præsidentiusoq Kurmanbek Bakijev ajugaarujussuartoq, tusagassiuutit assigiinngitsut allapput.

Qinersisartut pingasuugaangata marluk Bakijevimik taasisimasut inernerit siulliit inunnillu isumasiuinerit takutippaat.

Tv-qarfiup Kanal 5-ip, naalagaaffimmit aqunneqartup tusarliussai naapertorlugit Bakijev 67 procentinit taaguunneqarsimavoq, illluatungiliuttut siuttuat Almasbek Atambaev 12 procentinit taaguunneqartoq.

Atambaevip qinigassanngortinnini tunuartikkaluarpaa, qinersinermili aqutsisut tamanna akuersaanngilaat.

Illuatungiliuttulli qinersinermi peqquserluttuliortoqarsimasoq oqaatigaat, qinersinerup inernera Kirgistanip illoqarfiisa pingaarnersaani Bisjkekimi akeriuffigissamaarlugu.

- Qinersineq inatsisit unioqqutillugit ingerlanneqarpoq. Taamaammat qineqqusaarunnaarpunga, taamaaliunngikkumami præsident Bakijev uppernaartuusutut isigineqarnialeqimmat, Atambaev oqarpoq.

Kirgistanimi innuttaasut amerlanersaasa muslimiupput, nunallu Asiap qiterpasinnerusortaaniittut pillugit USA-p Ruslandillu aaqqiaginngissuteqarneranni pingaaruteqarluinnarluni.

USA Kirgistanimi angisuumik sakkutooqarfeqarpoq, Afghanistanimi sakkutuuliisoqarnissamut pingaaruteqarluinnarluni.