Kuppilersissut nutaaq misilerarneqaleruttorpoq
Danmarkimi Statens Serum Institutimi franskit nakorsaasiorfissuat Sanofi Pasteur aningaasaliisoralugu kuppilersissut nutaaq misilerarneqaleruttortoq, aviisip Politikenip nittartagaani allaaserinnittoqarpoq.
Kuppilersissutip maanna atorneqartartup Calmette-vaccine-mik taaneqartartup ukiuni qulini 15-iniluunniit taamaallaat atasinnaanini sanngeeqqutigaa. Kuppilersissutip nutaap Hyvac4-mik taaguuserneqarallartup, Calmette-vaccinep pisinnaasai sivisunerulersissinnaavai – taamaalilluni inuuneq naallugu attaneqarsinnaasunngorlugu.
Ilisimatusartut neriuutigaat kuppilersissutip nutaap sakialluummik nappaat nungutissinnaassagaa, soorlu kupperneq 1980-imi nungutinneqareersoq. Tamannali ajornaatsuinnaanavianngilaq. Nunarsuarmi innutaasut pingajorarterutaat sakialluummik tunillanneqarnikuupput, naak amerlanerit nappaat napparsimalissutigineq ajoraluaraat, ukiut tamaasa inuit 1,5 miliuunit nappaat toqqutigisarpaat allallu 8 imaluunniit 9 miliuunit tunillannettarlutik.
Sakialluut aids aamma malaria assigalugit nappaatit tunillaassuuttartut ulorianarnerit ilagaat nunarsuatsinnilu siaruaassimanerpaat ilagalugit. Malunniutigisarpai kissarneqarneq, unnuakkut kiakkeqattaarneq, sanigorneq, qasoqqaneq, quersorneq qitserarnerlu.
Kuppilersissut nutaaq 2015-imi tuniniagaalersinnaasoq oqaatigineqarpoq.
