Kunuunnguaq utertariaqartoq

Allattoq Carla Davidsen
aggustip 16-at 2005 16:58

Air Greenlandip timmisartuutaa, Boeing 757 – Kunuunnguaq – teknikkikkut akornuteqarneq pissutigalugu - Cypernimi Larnacami mittarfimmut sapaatiummat utiinnartariaqarsimavoq.

Kunuunnguaq ilaasoqarsimanngilaq, attartorneqarluni angalagaluarluni.

Timmisartorsuaq Københavnip tungaanut tingereernermi kingorna ajornartorsiulerpoq, taamaalilluni utiinnartariaqalerluni, maannalu misissorneqartoq nalunaarutigineqarpoq.

Kunuunnguup teknikkikkut ajoquteqarluni utiinnartariaqarsimanera nunatsinni timmisartuussinermut ajoraluartumik sunniuteqassaaq, Narsarsuarmut aqagu pingasunngornermi tallimanngorpallu augustip ulluisa 19-ianni timmisartoq taanna atorneqarsinnaajunnaarmat.

Maersk Air-ip timmisartuutaasa ilaat, Boeing 737-400, Air Greenlandimit taarsiullugu attartorneqarpoq, tassa Narsarsualiartussat, Narsarsuarmeersussat, nassiussat allakkallu timmisartumut Maersk Airimeersumut ilaassallutik.

Air Greenland sapinngisaq naapertorlugu sukkanerpaamik aaqqiiniarluni sulissuteqarpoq, Kangerlussuarmulli Kangerlussuarmiillu ingerlaarfik aasaanerani suli ingerlaarfigineqarluarpoq, taamaattumillu Nunatsinnut Københavnimullu Kangerlussuakkoorluni angalanissaq sapaatip akunnerani uani pisinnaanngikkallarpoq.