Kunuunnguaq timmisartuussisarunnaassaaq
Narsarsuup Københavnillu akornanni toqqaannartumik timmisartuussineq aasaanerani taamallaat pisalissaaq.
Kujataanit Danmarkiliartussat Kangerlussuakkut timmisartuunneqartalernerisigut Danmarkiliartarnerit Kitaanilu illoqarfinnut attaveqarnerit, unnuinertaqanngitsumik akinillu qaffaataanngitsumik, amerlissasut, Air Greenlandimit oqaatigineqarpoq.
Aamma Air Greenlandimit oqaatigineqarpoq ilaasut aasaanerani akikinnerusumik angalasinnaalisasut, allanngortitsinerit unammillerneqarnerup pakkersimaarniarneranik peqquteqarmata.
Timmisartorsuup Boeing 757-ip tunineqarnera ilutigalugu timmisartut Dash 8-t marluk pisiarineqassapput. Timmisartup aappaa ukiup sinnerani sapaatip akunneranut marloriarluni pingasoriarluniluunniit Narsarsuarmiit Kangerlussuarmut, Danmarkimut aqquteqarnerani, timmisartuussisassaaq.
Dash-8-t marluk Dash-7-inut tapertassatut atulissasut, Air Greenlandimit oqaatigineqarpoq.
Kommune Kujallermut inuussutissarsiornikkut ineriartortitsileruttorpoq, borgmester Simon Simonsenillu aarleqqutigaa, Air Greenlandip allannguiniarnera Kujataaniit Nunanut allanut angalaniarneq ajornerulissasoq.
- Qularutiginngilarput, Kujaani aatsitassasiorneq annertusarneqassasoq. Taamaammat nunanut allanut toqqaannartumik attaveqarnissaq pisariaqartussaavoq, Simon Simonsen oqarpoq.
Air Greenlandimit paasissutissat naapertorlugit taamatut aalajangertoqarneranut peqqutaavoq, ukiuni kingullerni amerlasuuni Narsarsuarmiit Københavnimut aqqutip 10-15 mio. koruuninik amigartoorfiusarnera, naatsorsuinerillu takutimmassuk Boeingip tunineratigut timmisartuussinissanilu pilersaarutit allanngortinnerisigut ukiumut 30.mio. koruuninik sipaaruteqartoqarsinnaasoq.
Allannguinerit 2010-p ukiaani aatsaat atuutilissapput. Kunuunnguup tuninera Air Greenlandimi sulisut 25-t soraarnerannik kinguneqassaaq.