Katuami saqqummersitsineq: Inuiaqatigiit eqqumiitsuliani atorlugit eqqarsalersinniarai

Saqqummersitsineq sammisanut arfinilinnut agguataarneqartoq, eqqumiitsuliortup sammisaq ataaseq pingaartilluinnarpaa:

- Titartakkat ilaat qinngornernut Narsamilu uranisiornermut tunngasuupput, eqqumiitsuliortoq Naja Abelsen oqarpoq.

Taassuma kujataani uranisiornissaq akuerineqassappat pinngortitamut, inunnut uumasunullu sunniutigisinnaasai titartakkamigut takutinniarsarai:

 - Uranimut ilisarnaat titartakkami siaruaatsisippara. Kujataata mingutsitsinermik eqqugaanissaa annilaanngatigaara. Tassami uranimik piiaanissaq akuerineqarpat kujataa sequmissaaq, eqqumiitsuliortoq KNR-imut oqarpoq.

Eqqumiitsuliornikkut misigissusilerineq

Naja Abelsenip eqqumiitsuliani atorlugit misigissutsini isummanilu anninniarsarai:

- Politikeriunnginnama issiaannarlunga tusarnaaginnarnissara anneraara. Taamaammat eqqumiitsuliorlunga isummersorpunga, inuillu minnerpaamilluunniit eqqarsariartinnissaat anguniarpara, Naja Abelsen oqarpoq. 

Inuiaqatigiit eqqumiitsuliani atorlugit eqqarsalersinniarpai:

- Inuit pinngortitarlu pineqarmata sumiluunniit ajutumeertoqartartoq takutinniarsaraara. mianersoraluaraanniluunniit mingutsitsisoqartussaavoq, urani mianersuunneqarsinnaanngilaq, ajortoortoqartuaannassaaq, Naja Abelsen, Katuami ukiut aqqanillit matuma siorna kingullermik saqqummersitsisoq oqarpoq.

Oqaluttuatoqqat aallaavigalugit digitaliusumik suliat, MIO-p atuakkiarititaanik assitalersuineq, uumasut meditationilu atorlugit eqqumiitsuliorneq, saqqummersitaasa ilaatigut imarai.

AAMMA ATUARUK Naja Abelsen saqqummersitsilersoq

- Nunarsuaq uumassusilik kusanartorsuuvoq, paasiuminnaallunilumi imminut ajortumeerniarnertut ittumik, uagut inuit nunarsuaq tamakkerlugu aserorterinerujussuarput, Naja Abelsen suliani pillugit ilaatigut taama allappoq. 

Naja Abelsenip eqqumiitsuliai Katuami decembarip 17-iat tikillugu alakkarneqarsinnaapput.