Kunngissat naligiissitaassanersut taasissutigissavarput

Kunngeqarfiup Danmarkip kunngissanngortitsisarneq pillugu taasisitsinerani sapaatiuppat juunip arfineq-aappaani pisussami, taaseqataaniaraanni nalunaaqutaq ullaakkut qulingiluaniit unnukkut arfineq-pingasut tungaanut taasiartortoqarsinnaavoq.
Allattoq Mads Lynge
juunip 05-at 2009 07:11

Taaseqataasinnaassagaanni danskisut innuttaassuseqartariaqarpoq, 18-ileereersimasariaqarluni, tassa Inatsisartunut qinersinermut piumasaqaatigineqartut assigai.

Taasissutigineqartussat tassaapput AAP immaluunniit NAAMIK - aammattaarli taasivissaq allaffiginagu aamma taasisoqarsinnaavoq.

AAP-imik taasineq tassaavoq Danmarkimi kunngissat arnat angutillu naligiissitaanissaannut akuersaarneq. NAAGGA-mik taasigaanni inatsisit ullumikkut atuuttut allanngortinneqannginnissaat kissaatigineqassaaq.

Tassami Danmarki arnamik ullumikkut kunngeqareeraluarpoq, tamatumunngali pissutaaginnarpoq Dronning Margrethep angajoqqaavi - Frederik aamma Ingrid - paniinnaqarmata, pingasunik. Ullummikkullu inatsisit najoqqutaralugit Margrethe aqqaluartaarsimasuuppat, taanna kunnginngorsimassagaluarpoq.

Taasissutigineqartoq najoqqutaralugu kunngikkormiunit qitornartaarineqartoq siulleq - nukappiaraanera niviarsiaraaneraluunniit apeqqutaatinnagu - kunnginngorsinnaalissaaq. Tamannalu Nunatsinni innuttaasut akueriumanerlugu akueriumannginnerluguluunniit sapaatiuppat taasissutigissavaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq