Kunngissaq OL-updatemi
Danmarkimi Timersortartut Kattuffissuata DIF-ip internetimi TV-kkut kanalimi nutaami ”OL Update”-mi – nittartakkami ol.dk-mi kunngissap Frederiup Nunat Tamalaat Olympiadimut ataatsimiititaliaanni – IOC-mi ilaasortanngorniartutut apersorneqarnera takutippaa.
Allattoq Elisa Isaksen
” IOC-p suliassaasa amerlanerpaartaat timersornermut tunngasuupput. Politikkikkut apeqqutit takkuttarumaartut allanut suliaritittarumaarpakka”, kunngissaq oqarpoq.
IOC-p siornatigut demokrati malillugu ingerlanneqannginneranik siunertaqapilullutillu akilersittarnerit eqqaaneqarmata, kunngissaq oqarpoq IOC siornatigut tusaamanerlunneqarsimagaluartoq, maannakkulli ajornartorsiutaasut aaqqinneqareersut. IOC-p ullumi ingerlariaaserisaa 1990-ikkunnut assersuunneqarsinnaanngilaq, kunngissaq Frederik oqarpoq.