Kunngissaq Nunatsinniit tikeraartoqarpoq
Ataatsimiinneq Amalienborgimi pivoq, siunertarlu tassaavoq, Kunngissap, IOC-mut ilasortaanini pissutigalugu, Kalaallit Nunaanni Savalimmiunilu timersuutinik aamma ilisimasaqarnissaa, Nunatsinni timersorneq nunarsuarmioqatigiit ataatsimiinneranni taamaalilluni paasissutissiissutigisarsinnaassammagit, apeqqutinillu akisinnaaqqullugu.
- OL-imut Danmarkimi Ataatsimiititaliap Naalagaaffeqatigiit tamaasa pisussaaffeqarfigai, taamaammat Kunngissaq nunatsinni timersuutit, nunani allani unammissutigineqartartut pillugit paasitipparput. Soorlu sisorarnerni, arsarnerni tae-kwondornernilu nunarput aallartitaqartarpoq, Nuka Kleemann oqarpoq, ataatsimiinnerlu illuatungeriinnut pissarsiaqaataalluartoq oqaatigalugu.
Kalaallit Nunaanni Timersoqatigiit Kattuffiat, GIF, ataatsimiinnissamik aaqqissuussiumasimammat Kunngissap aamma nuannaarutiginerarpaa.
Londonimilu juulip ulluisa 27-anni Olympiadertoqalerpat Kalaallit Nunaanni timersorneq pillugu paasissutissiinissaminut toqqammavissaqarnerulerpoq.
Olympiadertoqarnissaanut Kalaallit Nunaanni Timersoqatigiiffiat marlunnik aamma Londoniliartitsissaaq, kikkulli aallartinneqassanersut suli aalajangerneqanngilaq.