Kunngissaq ilulissanukalerpoq

Sydkoreap præsidentia Lee Myung-Bak sapaat septemberip qulingiluaat Ilulissanut tikissaaq. Kunngissap Frederiup Asiamiit tikeraat ingiaqatiginiarpai.
Allattoq Noah Mølgaard
septembarip 01-at 2012 12:09

Naalakkersuisut siulittaasuat Kuupik Kleist aamma statsminister Helle Thorning Schmidt Sydkoreap præsidentianik Lee Myung-Bak-imik tikeraarsaasuupput.

Sydkorea atortorissaarunik innaallagissamoortunik sanaartortutut aatsitassanik qaqutigoortunik soqutigisaqarpoq. Taakkuunngillalli tikeraarnermi pisortatigoortumik oqaluuserisassatut allanneqarsimasut. Sydkoreap Københavnimi aallartitaqarfia nalunaarpoq sammineqartussat tassaasut avatangiisinik mianerinnilluni ineriartortitsineq aamma aatsitassarsiornikkut siuarsaaneq.

Lee Myunh-Bak malitserpassuaqassaaq sillimaniarnermullu paarsisorpassuarnik ungaluneqarsimassalluni. Nunatsinni politiit upalungaarsimanissaq piareersarlugu tamassa ulapputileruttorput. Maanna aamma paasinarsivoq Kunngissaq Frederik tikeraanut ilaasussanngortoq Lee Myung-Bak Ilulissanut septemberip qulingiluaat tikippat.

Lee Myung-Bak tikeraarniarpoq ulluni arfineq pingasuni angalanissaminut atillugu tassanilu Ruslandimut, Norge-mut Kazakhstanimullu tikeraarniarpoq.