Kunngissaq dronningilu isertortumik tikeraartut
Anaanaasup erneratalu Kalaallit Nunaannut angalaqatigiinnissartik qangali kissaatigisimavaat, nunatsinnukarnissaminnullu sapaatip-akunnerani kingullermi periarfissaqaleriaramik angalanissartik malunnaarsaavillutik pilersaarusiorpaat. Kunngikkormiut attaveqaqatigiinnermut pisortaat, Lene Balleby, aviisimut Billed Bladet-imut, kunngikkormiunik malinnaajuartumut, ilisimatitsivoq.
Siriusikkut ukiunik 60-inngortorsiorlutik nalliuttorsiornerat, aammali Danmarkimi sakkutooqarfiup Tunumi sulisimanerata nalliuttorsiutigineqarnerata peqataaffiginissaa angalanermi siunertaasimavoq, kisianni tassa aamma anaanaasup erneratalu angalaqatigiinnissartik qangali kissaatigisimavaat. Kunngissaq Siriusikkullu ukiut qulingajaat matuma siorna qaammatini sisamani qimusserput.
Angalanerminni qimussit kisiisa atorlugit angalasarput, illuaqqanilu unnuisarlutik. Billed Bladet-imi allaaserineqartut naapertorlugit Dronning Margrethe qajassuuteqqusimanngilaq, ernermisulli qimusseqataaginnarusulluni.
Danmarkimut utereeramik Kunngissaq Billed Bladet-imut oqaluttuarpoq, angalanertik nuannersimaqisoq, arnilu, 71-inik ukioqartoq, tupinnaannartumik nuannisaqaluni peqataasimasoq.
