Kunngissaq ataasinngorpat tikissaaq
Kunngissap Frederiup Nunatsinnut tikeraarnissaa qanittukkut pisussanngorpoq.
Taanna Aarhus Universitetimeersut peqatigalugit juunip 24-annit 27-annut Nunatsinniissaaq.
Kunngissaq ataasinngornermi juunip 24-anni angalaqatigiit ilagalugit Tunup Avannaaliassaaq. Angalanermini Aarhus Universitetip ilisimatuutut misissuiffittaavi Zackenbergimiittut, Daneborgimiittut atoqqaartissavai Station Nordimilu sanaartugassamut nivariaqqaartuussalluni.
Zackenbergimi Daneborgimilu ilisimatuutut misissuiffittaat Kunngissap atoqqaartissavai. Ilisimatuutut misissuiffinni taakkunani silap pissusiata allanngoriartornerata Tunup Avannaani issittumi immamut, naasunut uumasunullu sunniutaat misissuiffigineqassapput.
Station Nord angalanermi kingulliullugu tikeraarneqassaaq, tassani ilisimatuutut misissuiffissamut nunarsuatsinni avannarlerpaanut ilaasussamut nivariarneq siulleq pissalluni, misissuiffissarlu taanna 2014-imi piareertussatut naatsorsuutigineqarpoq. Station Nordimi ilisimatuutut misissuinerni immikkut sammineqassallutik, silap pissusiata allanngoriartornerata issittumi silaannarmut, immamut, uumassusilinnut nunamullu sunniutai.
Ilinniartitaanermut, ilisimatusarnermut Nunanullu Avannarlernut tunngasunut Naalakkersuisoq Nick Nielsen angalaqatigiinnut peqataassaaq.
