Kunngissap nuliata meeqqat qimarnguinniittartut nammattakkanik poortuukkai

Danmarkimi nunatsinnilu qimarnguinni meeqqat Kunngissap nulianit Marymit tunissutissarsisussanngorput. Pinngualiorfik Lego meeqqat anaanatik qimarnguimmeeqatiginerini qiimmassaatigisinnaasaannik nammattakkunut sisamanngormat poortuilerpat Kunngissap nulia peqataaniarpoq.

Legomi atorfeqarsimallutik soraarninngorsimasut meeqqat qimarnguinniittartut nammattakkanik 2000-init amerlanerusunik ukiut tamaasa poortuuttarpaat, Kunngissallu nulia Mary ukiormanna peqataassaaq.

Naalagaaffeqatigiinni meeqqat 2200-t missaat ukiut tamaasa anaanatik ilagalugit qimarnguinniittarput. Taakkulu affaasa missaat angerlarsimaffimminnit nassataqaratik qimarnguimmut pisarput.
 
Nunatsinni, Danmarkimi Savalimmiunilu qimarnguinni meeqqat nammattakkamik atorluarsinnaasaminnik pinngussanillu imalimmik 2008-miilli tunineqartalerput.

Aningaasaateqarfik Mary Fonden Ole Kirk's Fond aamma LOKK - Arnat qimarnguiisa nuna tamakkerlugu kattuffiat - suleqatigalugit nammattakkanik agguaassisarpoq.
 
Nammattakkat Mary Fondenimi immikkut ilisimasallit suleqatigalugit niviarsiaqqanut nukappiaqqanullu qanorlu ukioqarnermut naleqqusagaasarput. Meeqqallu qanoq ukioqarnerat apeqqutaatillugu nammattakkat ilaatigut kigutigissaatinik, illaajutinik, allarummik, imerfimmik, qalipaatinik, bamsemik, ullorsiutinik parnaarneqarsinnaasunik atuakkamillu imaqartinneqartarput.
 
Nammattakkat atugarliornermi saammarsaatissatut nakuusernerullu akuersaarneqarsinnaanngilluinnarneranik eqqaasitsissutitut tunniunneqartarput.