Kunngissap "Maajimi peqqissuusa" ammassavaa

- Assorsuaq tulluusimaarutigaarput kunngikkormiusut ataqqinassusilik  Kunngissaq Frederik tikissammat "Maajimi peqqissuusa" ammassallugu, suliniummik "Maajimi peqqissuusa"-mik aallarniisoq Morten Jørgen Heilmann KNRimut taama oqarpoq.

Ammaanersiorneq pissaaq apriilip 28-at atuartut 3. klasseniit 7. klassenut sisorarfimmi majuartaatip eqqaani assigiinngitsunik sammisaqartinneqassammata aammalu periarfissaqassallutik Kunngissap ilassinissaanut.

Aamma allamik timersortarfissuarmi Inussivimmi pisoqartussaavoq atuartut 1. klassemiit 3. klassemut assigiinngitsunik sammisaqartinneqassammata Kunngissarlu ilassisinnaassallugu.

- Assorsuaq nuannaarutigaarput suliniutit nuannersut saqqumilaartinneqassammata kunngikkormiunit tikeraartoqarnermut atatillugu. Imaakkajuttarpormi kunngikkormiut tikeraarnerannut atatillugu pisartut nuannerpallaanngitsut sammineqartarmata soorlu assersuutigalugu meeqqat sumiginnakkat, Morten Jørgen Heilmann taama oqarpoq.

Peqqinnartumillumi inooriaaseqarnissaq qitiusarpoq suliniut "Maajimi peqqissuusa" ingerlanneqaraangat. Siorna sammisassat assigiinngitsut 145-ut ingerlanneqarput Maajimi peqqissuusa Nuummi ingerlanneqarmat inuit peqataasut katillugit 17.000-iullutik.

- Ukiormanna pisussat assigiinngitsut 200-ut ingerlanneqassapput. Pisulli amerlassusaat uatsinnut pingaarnerunngilaq, pingaarneruvoq inooriaatsimik allannguisinnaasunik sammisaqartitsineq, Morten Jørgen Heilmann taama oqarpoq.

Maajimi peqqissuusa nammineq piumassutsimik ikiuuttut ingerlattarpaat.