Kunngissakkut tikeraarnerat: Nuummut tikeraarneq unnugu sioqqutsilluni aallartissaaq
Aqagu ullaakkut qulingiluat eqqaanniit erfalasuaqqanik agguaasoqalerumaartoq, Kommuneqarfik Sermersuumit oqaatigineqarpoq.
Tikeraarneralli ullumi aallartisarneqariissaaq, tassami Naalakkersuisut siulittaasuata Aleqa Hammondip kunngikkormiut Hotel Hans Egedemut neriartoqqusimammagit.
Kunngip umiarsuaa Nuup umiarsualivianut ualeru talissaaq.
Kunngissaq nulialu Mary Hotel Hans Egedemut neriartorneranni, qitornaat umiarsuarmiiginnassapput, aatsaallu aqagu nunamut ikaassallutik, tassa Kunngip umiarsuaa Nuutoqqamut uiariarluni kisareerpat nunamut ikaarumaaramik.
Rigsombudeqarfimmi pisortap tulliata, Jan Bøgnæsip oqaatigaa, kunngikkormiut ulluni kingullerni kangerlummi pinngortitami aliannaarsaarsimasut.
Kunngissaq Frederik piniarnissamut akuerineqarluni aavarsimasoq, Jan Bøgnæs aamma oqaluttuarpoq.
Taava ataata anaanalu Hotel Hans Egedemut qaleralinnik assagiarsunnillu neriartorpata, meeraat Dannebrogimi tuttup neqaa suaasalerlugu immaqa unnugu nerissavaat?
Tallimanngorpat Nuummi pilersaarutit:
Nal. 09.30
Kunngissakkut borgmesterimit Asii Chemnitz Narupimit Nuutoqqami tikilluaqquneqassapput.
Nal. 10.00
Kommunalbestyrelsip ataatsimiittarfianut pulaarneq, kulturikkut nittarsaassisuusimasoq Arnannguaq Gerstrøm aliikkusersuissaaq. Borgmesteri tikilluaqqusissaaq.
Nal. 10.45
Kunngissakkut Inatsisartut ataatsimiittarfiata tungaanut pisussapput.
Nal. 11.00
Kunngissakkut Inatsisartut siulittaasuannit Lars Emil Johansenimit tikilluaqquneqassapput.
Nal. 11.30
Kunngissakkut Naalakkersuisut siulittaasuannit Aleqa Hammondimit tikilluaqquneqassapput.
Nal. 12.00
Kunngissakkut Pinngortitaleriffimmut pulaassapput, pisortamit Klaus Nygårdimit tikilluaqquneqassapput.
Nal. 13.30
Kunngissakkut kajumissutsimik suliallit ataatsimoorfiat pulaarnerani peqatigiiffilerineq, timersoqatigiiffilerineq pitsaaliunerlu pillugit oqaluttuunneqassapput, taakkununnga Mary Fondenip tapersersugaa kammagiitta eqqartorneqassalluni.
Nal. 14.00
Kunngissaq Arctic Winter Games pillugu pisortamit Maliina Abelsenimit saqqummiiffigineqassaaq.
Nal. 14.10
Kunngissap nuliata Meeqqat Inuusuttullu Oqaloqatigiinnittarfiat MIO pulaassavaa meeqqat illersuisuannit Aaja Chemnitz Larsenimit tikilluaqquneqassalluni.
Nal. 14.45
Kunngissakkut Katuami kaffillernermi peqataassapput. Kaffillertoqarnerani nipilersortoqarlunilu eqqumiitsulianik saqqummersitsisoqassaaq meeqqallu atuagaannik kalaallillu ilusilersugaannik saqqummersitsisoqassalluni.
Nal. 16.00
Kunngissakkut Arktisk Kommando pulaassavaat.
Nal. 17.00
Kunngissakkut Aningaasaateqarfik Ivalo & Minik-up ilassinninneranni peqataassapput.
Nal. 19.00
Kunngissakkut kunngikkut umiarsuaanni Dannebrogimi ilassinnissapput.