Kunngissakkut Qaqortumut ullumi tikipput
Suliffeqarfiit arlallit takuniarneqarput aamma kunngissakkut meeraat immikkut orpinnik ikkussitinneqarlutik. Aamma kunngissakkut peqatiminnik assileqateqarput nuannarineqaqisumik.
Umiarsualivik niuffiortunik ulikkaavissoq ilaatigut Kommune Kujallermi kommunalbestyrelsemut ilaasortat kalaallisut atukkersorsimasut niorfioqataallutik. Aamma taakkununnga ilaalluni, KNR Kujataani suleqaterput, Jørgen Simionsen.
- Kunngissaq annoraaqarpoq qaqortumik kameqarlunilu, Mary kalaallisoorluni taavalu meeraat tamarmik kalaallit assuutaannik atorput, nukappiarataat kitaamiut annoraavannik atorput kameqarlutillu, kunngissakkut angajulliliaat avanersuarmiutut nannut qarleqarluni niviarsiarartaat, tunumiut assutaannik kitaamiullu assuutaannik atorlutik. Inequnaqaat alutornarlutillu.
Qaqortumi peqatiminnik assiliseqateqarput
Kunngissaq Frederik 1968-mi inunngortoq, nulialu Mary 1972-mi inunngortoq, Qaqortumiinnerminni peqatiminnik assiliseqateqarnissaminnik pilersaaruteqarput, tamannalumi aamma piviusunngortoq, suleqaterput Jørgen Simionsen oqaluttuarpoq.
- Qaqortormiut 1968-imi inunngortut amerlagaatsiartut kunngissaq Frederik assiliseqatigaat, Mary 1972-imi inunngortoq amerlanngitsunik assiliseqateqarluni.
- Illoqarfinni allani aamma inunnik assiliseqatigineqartarput aamma ilutiginngisaraluaminnik, tamannami tunuarsimaarfigineq ajorpaat nuannarineqaatigisaraallu malunnarluni, Jørgen Simionsen oqaluttuarpoq imalu nangilluni.
Pulaagaat takuniagaallu amerlapput
- Ullumi pulagaat takuniagaallu amerlapput, ilaatigut GU pulaarneqarluni taamatullu Sulisartut Højskoliat, aalisakkani suliffissuaq, innerluutillit angerlarsimaffiat Ivaaraq taamatullu ammerivik Great Greenland pulaarneqarluni.
- Ualimut takuniagassaasa ilagaat Qaqortup arsaattarfia ivigaasaaqqanik qalligaq. Tassani K-33-ip meerartaasa kunngissakkut meerartaat tunissuteqarfigissavaat kiatinik K-33-ip atortagaattut ittunik
KNR Kujataani suleqaterput, Jørgen Simionsen taama oqaluttuarpoq.
Kunngissakkut malittaallu umiarsuarmut Dannebrog-mut ilaallutik Qaqortumiit unngu nalunaaqutaq arfinermut aallassapput, Paamiunut aqagu ulloqeqqanut tikissallutik.
