Kunngissakkut unnuaq ernertaarnerat pillugu, ullumi Nuutoqqami ulloqeqqanut qamutilittarneq taama nipeqarpoq.
Pisarnertut inunngortoq ilaqutaalu ataqqiniarlugit 21-eriarluni qamutilittartoqarpoq, borgmesteriugallartorlu Maliinannguaq Markussen Mølgaard pilluaqqusilluni oqalugiarpoq. Oqalugiareernerup kingorna inuit 100-t sinnilaarlugit najuuttut inuiattut erinarsuuterput ”Nunarput utoqqarsuanngoravit” erinarsorpaat.
Danmarkip nalunaaqutaa malillugu kunngissap nulia Mary unnuaq marlunngulivissoq ernertaarpoq. Nukappiarannguaq 3 kilo 500 gram-imik oqimaassuseqarpoq, 51 centimeterisullu takitigaluni.
Kunngissaq Frederik-iup Rigshospitalip isaariaani tusagassiortut naapikkamigit, nuannaarpaseqaaq pilluarpaseqalunilu.
-Kunngissaaraq inoorlaatut 8 tiiminik inuusimasutut isikkoqarpoq. Misigisaq uannut nuliannullu tupinnaqaaq nassuiaruminaallunilu, Kunngissaq Frederik qungujulaqisoq oqarpoq.
-Inunngortoq ajunngeqaaq, nalulluinnarpaalu siunissani qanoq ittuujumaarnersoq, kunngissaq ilanngullugu oqarpoq.