Kunnginngortarneq pillugu inatsit akuerineqanngitsooriataannaavoq
Tamanna Gallupip Berlingske Tidende sullillugu qinersisartunik qanittukkut isumasiuinerata ersersippaa.
- Akuersissutigineqarnissaa qularnartulerujussuuvoq, taama oqarpoq taasisitsisarnernik ilisimatusarsimasoq, ilisimatooq Søren Risbjerg Thomsen, isumasiuisitsinerup inerneranik misissueqqissaareerluni.
Tassami Europami Europaparlamentimut qinersinermut atatillugu Danmarkimi taasisitsissutigineqartussaavoq. Europaparlamentimut qinersinerup, Danmarkimi qinersisartut 40 procentiinnaannit peqataaffigineqarnissaa naatsorsuutigineqarmat, Inatsimmi tunngaviusumi taasisitsinerup qinersisartunit ikinnerpaamik 40 procentinit peqataaffigineqarnissaanik piumasarineqartup naammassineqarsinnaanera qularnartoqartinneqalerpoq.
Gallupip isumasiuisitsinerani ersersinneqaraluarpoq, kunnginngortarneq pillugu inatsisip allanngortinneqarnissaanut qallunaat 84 procentii akuersaartut, allanngortinneqassappalli qinersisartut taaseqataanissaq pisariaqarpoq.
Maani Nunatsinni inatsimmut allannguutissatut siunnersuut aamma juunip arfineq-aappaanni taasissutigineqassaaq - tassa Inatsisartunut qinersinermit ullut tallimat qaangiuppata. Taamaattorli Nunatsinni qinersisartut tamarmik akuersillutik taasigaluartaluunniit, tamanna inatsisip allanngortinneqarsinnaanissaannut naammannavianngilaq.
