Kunngikkormiut Pituffimmiipput
- Ippassaq Sermersualiarpugut unnuisussaagaluarlutalu silap allanngornera pissutigalugu akunnialuit ingerlaneranni sermip qeqqani paasisassarsiorsinnarluta Pituffimmut uteqqippugut. Sermimi unnuinngilavut, utersinnaajunnaarnissarput timmisartortartut aarlerigileramikku.
Aqagu Siorapalummukartussaavugut Qaanaamullu, timmisartukkut angalanissarput pilersaarutaagaluartoq massakkut umiarsuartussanngorpugut isumannaannerummat. Paasisakka naapertolugit Kunngikkormiut siusinnerusukkut Siorapalummukarniaraluarlutik iluatsinngitsoorsimagamikku, taamaammat umiarsuarmik avannamukassuugut.
Sermersuarmiinnersi sivikikkaluartoq Dronningip Prinsillu NEEM-imi pisut malinnaavigilaarsinnaasimassavaat?
- Misissuisut qillerisullu qiimmassimaartupilussuupput, ippassaammat sermip naqqa tikissimagamikku qillerinerlu kingulleq ingerlassimallugu.
Sermersuarmimi tupermi unnuisussaagaluarnertik pakatsissutiginerlugu?
- Tupermi unnuinissaq pissanganartut ilagigaluarpaat, kisianni pilersaarutit isumannaatsumik ingerlasariaqassappata allatut ajornartumik maanga Pituffimmut utertariaqarsimavugut, aamma sila anorlilaalerlunilu siallilaalernikuuvoq, taamaattumik uternerput qujanaannarpoq.
Ullumikkut Pituffimmiippusi, susoqassava?
- Pituffiup oqaluttuassartaa oqaluttuarineqarpoq, Pitufillu angalaarfigaarput, aamma Dundasimut takuniaassuugut, maanilu sakkutuut naalagaat oqaloqatigisussaallutigu. Massakkorpiaq maani ilisimatusartut ilaat, kissaviarsunnik paasisaminik oqaluttuarpoq, Kuupik Kleist oqarasuaatikkut Pituffimmiit ullumi taama oqaluttuarpoq.