Kunngikkormiut inuiaqatigiinnut qanoq akeqarnersut saqqummiuneqassapput
Taamatut neriorsuuteqarneq ministeriunerup sap. akunnikkuutaartumik tusagassiortunik katersortitsinerani oqaatigineqarpoq.
- Suut tamarmik paasiuminartuunissaannut qamuuna tapersersuisuuvunga taamaattumillu isumaqarlunga Danmarkimi kunngeqarnermut atasumik aningaasartuutaasartut tamakkiisumik paasineqarnissaat saqqummiunneqarnissaallu maanna isumassarsiatsialaassasoq, taama ministeriuneq oqarpoq. Taassuma taamaalilluni SF-imit piumasaqaat akissuteqarfigaa, tassanilu tunuliaqutaalluni kunngikkut naalakkersuisutigoortumik taamaallaat 88 mio. kr.-inik ukiumut akeqarnerarneqarmata, aningaasartuutilli tamaasa ilanngullugit naatsorsorneqarpata amerlanerujussuussallutik.
Lars Løkke Rasmussenip erseqqissarpaa kunngikkut atorunnaarsinniannginnamigit aningaasarpassuillu atorneqartassammata apeqqutaatinnagu dronningeqarnersoq dronningeqannginnersorluunniit.
- Takorluussagaannimi kunngikkut ilaqutariit peqanngikkaluarpata taava Amalienborg Fredensborgilu atajuassapput, Lars Løkke Rasmussen naggasiivoq. SF-ip siunnersuutaa takkuppoq, Hollandimi kunngikkormiunut aningaasartuutit misissuiffigineqareernerisa kingornagut paasinarsimmat Hollandimi kunngikkormiunut aningaasartuutiviit aningaasanut inatsimmi takuneqarsinnaasutut aningaasat amerlassusissaanninngarnit sisamariaammik tallimariaammilluunniit amerlanerusartut. Danmarkimi pissutsinut tamanna tutsissagaanni tamatuma kingunerissavaa kunngikkormiut 400 mio. kr.-inik akeqartartut, imaanngitsoq aningaasanut inatsimmi takuneqarsinnaasutut 88 mio. kr.-inik.