Kunngikkormiut ICC-mut tapersersuipput

Saaffiginnittarfissap pingaarnertut suliassaa tassaassaaq nunap inoqqaavi pisinnaatitaaffii alaatsinaaffigissallugit, Inuillu Issittormiut Siunnersuisoqatigiiffianni siulittaasup Aqqaluk Lyngep kunngikkormiunit tapersersorneqarniarnertik iluarisimaarpaa, aatsitassat pillugit ukiuni kingullerni ineriartorneq eqqarsaatigalugu inuttut pisinnaatitaaffiit pillugit Nunatsinni saaffiginnittarfeqalernissaq pingaaruteqartinnerarlugu.

- Pisuussutit uumaatsut pillugit nunanit allanit soqutiginninnerujussuaq eqqarsaatigalugu pingaaruteqarpoq ilisimasat katersorneqarnissaat, inuttut pisinnaatitaaffigut illersorneqarnissaat pingaaruteqarmat, Aqqaluk Lynge tusagassiutinut nalunaarummi ilaatigut allappoq.

Nuuk Deklarationimik taallugu ICC-p siorna aasakkut ataatsimeersuarnerani isumaqatigiissutigineqartoq, Naalakkersuisut siulittaasuata Kuupik Kleistip ukiortaami oqalugiarnermini ilaatigut oqaatigaa saaffiginnittarfeqalernissaq aamma pingaaruteqartoq.