Kunngikkormiut aningaasanik agguaapput

Nunatsinni sulianut assigiinngitsunut aningaasaliissuteqassallutik, kunngikkormiut aalajangersimapput.

Aningaasat katillugit 120.000 koruunit agguaanniaraat, Dronninngip atorfilittaa hofmaskal Ove Ullerup ilisimatitsivoq.

Aningaasaliiffigineqartussallu tassaapput; Fox Media, taassuma Avanersuarmi piniartut pillugit filmiliassaa 25.000 koruuninik aningaasaliiffigineqarpoq.

Taava Danmarkimi avatangiisinik misissueqqissaartarfik DMU 20.000 koruuninik, nunatsinni Tasmaniamilu tatsinik misisuinissamut atugassaanik tunineqarpoq.

Aamma meeqqanik ikiuniaqatigiiffik Foreningen Grønlandske Børn 50.000 koruuninik tunineqarpoq, taavalu naalagaaffiup katersugaasivissuani immikkoortortap; inuiaqatigiit immikkut pigisaannut atortagaannullu katersugaasiviup ilisimatusaatigalugu misisuinissaa 25.000 koruuninik tunineqarpoq.

Dronninngip uiatalu 1967-imi juunip ulluisa qulinganni katinnerannut atatillugu aningaasat saqqummersinneqartut tuniniarneqartullu Kunngikkormiut aningaasaateqarfiannut nakkartinneqarnikuupput.