Kunngikkormiut angerlarput

Kommunalbestyrelsemi ilaasortap, Kalistat Lundip, oqalugiarnermini nunatta kunngikkormiunut sooq taama nuannarinnitsiginera eqqartutsiarpaa.

Kunngikkormiut takusassarsiortinneqarneranni kulturikkut illumi 'Muku'-mi eqqumiitsulianik takutitsisoqarpoq. Takuniaaqataasut amerlapput alakkarteriffigineqartullu inissakillutik. KNR-imilu sulisoq eqqumiitsuliat ilaannik sakatsilluni nakkartitsisoormat Ataqqinartorsuaq naveersitsiarpoq.

- Kinaana tukassaasoq?!

Inuili ulloqeqqasiutinik sassaalliivoq. Tamatuma kingorna tikeraat savaatilimmut aamma nersussuaatilimmut Sofus Frederiksenimut ilaqutaanullu alakkarterisinneqarput.

Kaffisoqatigiinneq Hotel Narsami pivoq. Kaffisoreernerullu kingorna kalallit immiaaraliaannik Narsami immiaaqqanut maqitsivimmeersumit misiliisitsisoqarpoq. Maqitsivimmeersut oqaluttuarput immiaaraliaq nutaarluinnaasoq kuannermik akoqartoq. Nunatsinili immiorneq nutaarluinnaanngilaq. Dronningimmi nunatsinni immiortarnerup oqaluttuassartaa eqqartullatsiarmagu.

Immiortut ittuat, Svend Vaa, immiornermini Dronningikkunnit ikioqquvoq. Kisianni Prins Henrik-ip sungarnittussat angingaatsiartorsuit nappartamut immiorfiusumut nakkartimmagit Dronningi nilliallappoq. Qujanartumilli Dronningip sialussiutaanut annerpaaq tuppoq. Talittarfimmi narsarmiut tikeraaminnut meeqqat kalattoortillugit, Tae-Kwondomik takutitsinermik erinarsoqatigiillu erinarsornerannik naggasiillutik inuulluaqqusipput.

Kunngikkormiullu umiarsuaat talittarfimmit avalappoq. Tassani aamma sakkutuut umiarsuaata 'Hvidbjørnen'-ip kunngikkormiut umiarsuaannut ingiallortaasimasup, angalasut qamutilittarnertalimmik avissaarlugit inuulluaqquai. Avissaarneranni sakkutuut umiartortut siassimallutik nikorfapput.

Kunngikkormiut Nunatsinni angalanerat taamaalilluni naggataarneqarpoq. Nunatta avannaaniit kujataanut ulluni 16-ini angalaneq. Ataqqinartorsuaq uialu Prins Henrik Narsarsuarmiit ullaaq aallarput, Gråsten-imullu ullumi nuullutik.