Kunngikkormioq sermersuarmukalerpoq

Hollandimiut kunngissaat, Willem-Alexander, Nunatsinni sermersuarmi maajimi unnuisussanngorpoq.
Allattoq Carla Davidsen
apriilip 20-at 2011 08:13

Hollandimi nutaarsiassaqartitsiviup, Radio Netherlands Worldwide-p, nittartagaani pisussaq atuarneqarsinnaavoq.

Issittumi immap itissusaanik-sermersuullu issussusaanik- ilisimatuut uuttortaasartut Europameersut, ESA, hollandimiut kunngissaata tikeraassavai. Taamaaliornissamut ikiortaavoq qaammataasaq, Cryosat, ukiup ataatsip missaa qaangiummat avataarsualiartinneqartoq.

Ilisimatuut Svalbardimi kangerliumanermi, Fram Strædimi, Devon Islandimi, Canadallu avannarpasissuani, sikumik timmisartumiit ilutigalugu aamma uuttortaapput. Amerikamiut avataarsualiartitsisarfiat, NASA, ilisimatuut suliniutaanni suleqataavoq.

Pinngortitaq pillugu nunarsuaq tamakkerlugu suliniaqatigiiffik, WWF, hollandimiup kunngissaannik qaaqqusisuuvoq. Holland pukkitsunnguummat, sermersuup aakkiartornerata uuttortarneqarnera tasamiumiunit soqutigineqartorujussuuvoq.

Kunngissap Willem-Alexanderip tikeraarnermini Naalakkersuisut siulittaasuat, Kuupik Kleist, aamma naapissavaa.