Kunngi nutaaq: - Angutaavoq inutsialak paasisaqarusuttorlu
Hollandimi kunnginngortoq ullumi ivertinneqarpoq, tamannalu Amsterdamimi nalliuttorsiualaarnikkut pivoq.
Kunnginngortoq oqaaseqarpoq, oqalugiarnerminilu arni, Dronning Beatrix, ukiuni 33-ni dronningioreerluni ulloqeqqata siorna tunuartoq, nersorpaa. Willem Alexander neriorsuivoq nunani kiffartuunniarlugu, hollandimiullu ulluni ajunngitsuni ajortunilu kattutsinniarlugit.
Hollandimi Inatsisartunut ilaasortat tamarmik, 16-it kisimik pinnatik, kunngimut kiffartuussiniarlutik kinguninngua uppernarsaapput, taamalu pisoqareermat balkonngimut anillappoq, Hollandillu 1890-imili angummik kunngeqalernera pisortatigoortumik nalunaarutigalugu.
Hollandimi ullumi tassa taama nipaqarpoq.
- Angutaavoq inutsialak paasisaqarusuttorlu.
Inuit Issittormiut Siunnersuisoqatigiiffiata siulittaasuata, Aqqaluk Lynge-p, Hollandimi kunnginngortup pissusia taama nalilerpaa.
Naalakkersuisunut siulittaasuusimasoq, Kuupik V. Kleist, aamma Pinngortitaleriffimmit Kalaallit Nunaatalu Katersugaasivianit aallartitat peqatigalugit Willem Alexander 2011-mi maajimi naapippaat, taamani kunngissaq Kalaallit Nunaannut tikeraarmat.
Taamani ilaatigut sermersuarmiippoq, Pinngortitaleriffimmut Nunattalu Katersugaasivianut aamma takornarniarluni. hollandimiullu arfanniartartut 1700-ikkunni Kalaallit Nunaannukakulasimanerat Nunatta Katersugaasiviani paasisaqarfigingaatsiarpaa.