Kunngi Makkallu nersornaaserneqarput
![](/sites/default/files/styles/image_934x467/public/article_images/kunngi_foto_hans_ole_storch_630.jpg?itok=_g5T2PJw)
Kulturikkut suliniuteqarluartumut nersornaat 1982-imi siullerpaamik tunniunneqartoq, kalaallit kulturikkut inuunerannut malunnaatilimmik immikkut suliniuteqarsimasumut tunniunneqartarpoq. Nersornaatinik ukiormanna tunisisuulluni kulturimut naalakkersuisoq Mimi Karlsen.
Taassuma Frederik Kristensen Kunngi oqaaatigaa, tassaasoq eqqumiitsuliortoq tamatigoortoq, imaannaanngitsoq ukiorpassuarni qalipakkaminik assilialiortarnermigut ilisimaneqarlualersimasoq, nunatsinni nunanilu allani saqqummersitsisareersoq. Aammattaarli taalliortutut erinarsuusiortutut erinniortutullu saqqummertareersoq aamma suliakkiutinik kusanarsaataasunik suliaqartartoq titartagartalersuisarlunilu, soorlu atuakkanik aamma allagartarsualianik, juullimut nipitittakkamik aamma suliffeqarfiit ilisarnaataanik, soorlu Mimi Karlsen taama tunngavilersuisoq.
Makka Kleist pillugu Mimi Karlsenip isiginnaartitsisartutut ukiorpassuarni ullormanna tikillugu inuttaaffigisarsimasai eqqaavai, aamma Nunatta isiginnaartitsisartoqatigiivini ilaanera eqqaallugu.
- Ilinniartitsisutut isiginnaartitsisartutullu sulinermini kalaallisut oqaatsitta atorneqarnerat ilisimaneqarnerulernissaallu pingaartittuarpai. Ilinniartitsisuunermini aamma isiginnaartitsinermut atatillugu suliaqartarnermigut meeqqat massakkut inuusuttunngortut kalaallisut oqalulluarsinnaalersimanerat angisuumik sunniuteqarfigisimavai, Mimi Karlsen ilaatigut taama oqarpoq.
Allagartap nersornaatisiap saniatigut nersornaaserneqartut tamarmik immikkut 25.000 koruuninik tunineqarput.