"Kunngi" Illu Atlantikumi saqqummersitsivoq

Eqqumiitsuliortoq tamatigoortoq, Kunngi, Frederik Kristensen, arfininngorpat Københavnimi Illu Atlantikumi nammineq eqqumiitsuliaminik saqqummersitsissaaq.

Soormitaavaana Frederik Kristensen Kunngimik taasaripput?

Frederik Kristensen inunngorpoq Uummannami 1952-imi, qallunaat kunngiata Frederik qulingiluaata Uummannamut tikiffia ulloq eqqorlugu. Kunngi Frederiup Uummannamiinnermini napparsimmavik pulaarpaa, meeqqallu inoorlaat uninngavianni meeraaraq pakkumiullugu tigummillatsiarlugu.

Tassa tamanna pissutigalugu Frederik Kristensen Kunngimik taagorneqalerpoq.

Tassa maanna qallunaat kunngikkormiuunngikkaluartut, Kunngip eqqumiitsuliai qalipaatigissaaqisut aamma eqqumiitsut abstraktit figurativiusullu takuniarsinnaalerpaat.

Kunngip taalliortarnini aamma erinniortarnini ilisimaneqaataasa ilagaat.

"Pilersaarutip piviusunngornera", tassa taama saqqummersitsineq qulequtsersimavaa. Saqqummersitsinerlu taanna NAPA-mit aamma Royal Arctic Line-mit aningaasalerneqarluni aqagumiit juunip tallimaat ilanngullugu takuniarneqarsinnaapput.

Una nittartagaq aamma alakkaruk:

http://bryggen.dk/default.asp?Doc=111&news=500