Kunngeqarfiup USA-mut ataatsimeeqatiginnittarnertik aallarteqqikkaa

Nunatta, Danmarkip USA-mut ataatsimeeqatiginnittarnerat, Joint Committee aallarteqqinneqarpoq. Kunngeqarfiup ataatsimiittarnerit 2014-imili peqataajumajunnaarneranit aatsaat aallarteqqinneqarpoq.

Namminersorlutik Oqartussanit, Nunanut allanut tunngasunut ministereqarfimmit amerikallu naalagaaffiata pisortaqarfianit atorfillit ataatsimittarfimmi, Joint Committeemi oktobarip 7-ianni, 2014-imi kingullermik ataatsimiipput.

Tamatumalu kingorna ataatsimiittarnerit nunatta Danmarkillu Pituffimmi 2014-imi kiffartuussinissamut isumaqatigiissutit akerliussutigalugit peqataaffigiumajunnaapaat.

AAMMA ATUARUK Nunatta Danmarkillu USA-p ataatsimeeqatiginissaa ukiuni arlalinni taamaatiinnartarsimavaat

Maannali qasukkaamisoqariartulerpoq. Nunanut allanut tunngasunut ministereqarfik KNR-imut mailikkut allappoq: “Kunngeqarfiup Joint Committeemi sulinerup 2018/2019-imi aallarteqqinneqarnissaa pillugu amerikamiut isumaqatigiissuteqarfigai.” Tamannalu nunanut allanut tunngasunut naalakkersuisoqarfimmi uppernarsarneqarpoq.

Joint Committee aamma Permanent Committee

Joint Committee Igalikumi isumaqatigiissut aallaavigalugu 2004-mi pilersinneqarpoq. Matumani nunatta, Danmarkip USA-llu akornanni suleqatigiinnerit assigiinngitsut ilaatigut ilinniartitaanermut, peqqinnissamut, ilisimatusarnermut kulturimullu tunngasut oqallisigineqartarput.


Permanent Committee 1991-imi USA-p Kangerlussuarmi mittarfik tunniummagu pilersinneqarpoq. Matumani USA-p nunatsinni sakkutooqarnikkut suliai pillugit paasititsisoqartarpoq.

Kunngeqarfiup kiffartuussinissamut isumaqatigiissutit perulluliuutaaneranni USA-mut isorinninnini paasitikkumallugu Joint Committeemi sakkutooqarnerlu pillugit ataatsimiittarfimi Permanent Committeemi ataatsimiittarnerit unitsippai.

Illersornissaq pillugu ilisimatusarfimmi lektorip Jon Rahbek-Clemmensenip naliliinera naapertorlugu ataatsimiittarnernut peqataajunnaarneq takussutissiineruinnarpoq.

- Kiffartuussinissamut isumaqatigiissusiornernut atatillugu pissutsit nammaginartinnagit Washingtonimut kalerriutigaat. Joint Committee kaffisoqatigiittarfiinnanngorsimavoq, peqataaffiunnaarneratigulli tamanna asuliunngitsumik isigigipput amerikamiunut takutipparput, Clemmentsen oqarpoq.

Joint Committeemi ataatsimiittarnerit uninnganeranni nunat pingasut suleqatigiitsitani marlunni suleqatigiipput, ilaatigut Pituffimmi siunissami kiffartuussinissamik isumaqatigiissuteqarnissamut malittarisassanik nutaanik suliaqarlutik.

AAMMA ATUARUK Pituffik pillugu isumaqatiginninniarnermi piviusorsiunngitsumik piumasaqanngilagut

Ukiulli sisamat maanna qaangiussimaleraluartut suli angusaqarfiunngillat.

USA-lli milliardit sisamararterutaat atorlugit Pituffimmi raadarimik nutarterisimanera paasineqarmat Permanent Committeemi ataatsimiittarnerit Kunngeqarfiup 2017-imi aallarteqqippai.

Joint Committeemili ataatsimiinnissamut nutaamut suli ulluliisoqanngitsoq, Namminersorlutik Oqartussat paasissutissiipput.

AAMMA ATUARUK Nutarterisarsimanerit USA-p ukiumut nalunaarusiaani atuarneqarsinnaapput

AAMMA ATUARUK Mittarfiliortiternermut aningaasaliissutit USA peqatigalugu oqaluuserineqarsimasut

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat