Kulusummut timmisartuussineq pillugu aalajangiisoqassaaq
Kulusummi mittarfiup aputeqarpallaarnerata kingunerisaanik isumannaallisaaniarneq ajornartorsiorfiuvoq, sapaatillu akunneri tulliuttut pingasut ingerlanerini timmisartuussisoqassanersoq Air Greenlandimit ullumi aalajangiiffigineqassalluni.
Allattoq Mads Lynge
Air Greenlandip timmisartornermut pisortaa mittarfimmi pissutsinik nammineerluni takuniaaniarluni Kulusummut ullumi nunnippoq:
- Kulusummi ulluni kingullerni aputaajaasoqarsimavoq, Air Greenlandip ingerlatsinermut pisortaa Jørgen Erik Andersen radioaviisimut oqarpoq.
- Allaanngilarli apummik sulluliarsuarmut nunnilluni, tamannalu isumannaallisaaniarnermut eqquinerlussinnaavoq, anoraasuassagaluarpat ajutoortoqaratarsinnaalluni, ingerlatsinermut pisortaq oqarpoq.
Timmisartornermut pisortaq Nuummut ullumi utereerpat Kulusummut timmisartuussineq pillugu aalajangiisoqarumaarpoq.