Kulusummi ikuallattoqarnerani nipilersortartut eqqugaapput
Nipilersuutit assigiinngitsut, aasaq kingulleq nipilersornermik festivalertitsisoqarnerata kingorna atuarfimmut tunniunneqartut, tumerparpaat, mikrofonit assigisaalu ikuallagussaapput. Aamma atuakkat amerlagaatsiartut ikuallannermi annaaneqarput.
- Pisoq alianartuuvoq, Kulusummilu meeqqanut nipilersornermik nuannarisalippassuarnut angisuumik annaasaqaataalluni, Kommuneqarfik Sermersuumi borgmesteri Asii Chemnitz Narup oqarpoq. Taassuma illu nipilersornermik ilinniartitsiffiusartoq siornatigut pulaarsimavaa, aamma illup nipilersuutillu nipilersornermillu ilinniartitsinerup meeqqanut qanoq pingaaruteqartiginerat takusimallugu.
- Nunaqarfiup siulersuisui ullumi ataatsimiigiaqquniarpakka, taamaalilluta nipilersuutinik nutaanik qanoq pissarsisoqarsinnaanersoq oqaluuseriniassagatsigu, taamaalilluni nipilersornermik ilinniartitsineq nipilersornermillu nuannarisaqarneq nangeqqinneqarsinnaaniassammata, Asii Chemnitz Narup oqarpoq.
Kommunip inissiaatileqatigiiffia Iserit illumik nipilersorfiusartumik piginnittuusoq peqatigalugu kommuni, Kulusummi nipilersortarfimmik allamik pilersitsinissaq isumaginialersaarpaat.
Illup nipilersortarfiusartup nungulluni illuallannerata kingorna, taassuma piaarnerpaamik pilersinneqaqqinnissaanut ikiuukkumasorpassuit saaffiginnissimasut, Kulusummi atuarfiup pisortaata, Lars Peter Sterlingip oqaatigaa, ilaatigut Islandimit saaffiginnittoqarsimasoq oqaatigalugu.
