Kulusummi aalisartut piniartullu qanoq annertutigisumik taarsiffigineqarusunnertik isumaqatigiissutigigaat
Mittarfeqarfiit Kulusummi sulaarimik 120.000 literimik sumut tamaannga kuuttoornerata kingorna Kulusummi piniagassat sunnerneqarput.
Piniartut juulleriartornerani tunisassaaleqileramik naalakkersuisunut aningaasanik ikiorserneqarnissaminnik qinnuteqarput.
300.000 koruuninik taarsiiffigeqqusut
Suliaq pillugu
Mittarfeqarfimmi Kulusummi dieseloliep tankimut nuunneqarnerani 120.000 literi sumut tamaannga kuuppoq.
40.000 literi tatsiniit milluarlugu uterteqqinneqarpoq. Sinneruttorlu 80.000 literi upalungaarsimasut imaanut kuussimassangatippaat, siaruaassimassallunilu.
Kulusummi aalisakkanik tunitsiveqanngilaq, taamaammat puisip amia neqaalu inuussutigineqarpoq.
- Uuliakoortoqarnerata kingunerisaanik puisit Kulusuup eqqaaniittut tammararput, Kulusummi piniartut aalisartullu peqatigiiffiani siulittaasoq oqarpoq.
Taamaammat Kulusummi aalisartut piniartullu aningaasatigut ikiorserneqarnissaminnik naalakkersuisunut qinnuteqarput.
Taarsiiffigineqarnissaminnik kissaateqarnerannut atatillugu Mittarfeqarfiit ataatsimeeqatiserai. Piniartut aalisartullu qulit katillutik 300.000 koruuninillu taarsiiffigineqarusullutik saqqummiussipput.
-Piniartoq ataaseq qaammammut 10.000 koruuninik taarsiivigineqarnissaa kissaatiginarpoq, taava qaammatini pingasuni 30.000 kroruunit kissaatigineqarlutik. Piniartut tamarmik Kulusummi ataatsimut isigineqarnissaat kissaatigaarput, Kulusummi aalisartut piniartullu kattuffianni siulittaasoq, Knud Kilime oqarpoq.
AAMMA ATUARUK Sæl er smurt ind i dieselolie - nu beder fangerne i Kulusuk om hjælp
Taakku taarsiivigineqarnissamik qinnuteqarnissamut immersugassanik Mittarfeqarfimmiit tunineqarsimallutik ilanngullugu oqaatigaat.
Kulusummi sulaarip sumut tamaannga kuunnnerata kingorna ullumikkut qaammatit marluk qaangiutereersut Kulusuup eqqaani suli puisaasannera nunaqarfimmi piniartut maluginiagaasa aamma ilagaat.
-Ullormut takussaangajappugut, puiseqanngingajavittarpoq, ilaanni ullormut takuneq ajorpugut, aallartuaraluarput piniartut, tikiussisarnerat killeqartorujussuanngornikuuvoq, Knud Kilime oqarpoq.
AAMMA ATUARUK Uuliakuungaatsiartoqartoq: 120.000 literi tankimit aniasoq
Kulusummi aalisartut piniartullu piumasaqaataat allaganngorlugit suli takunnginnamigit akissuteqarfigisinnaangikkallarlugu Mittarfeqarfinni ingerlatsinermut pisortaq, Niels Grosen allakkatigut akissuteqarpoq.
Kulusummi aalisartut piniartullu qulit taarsiiffigineqarnissaminnut immersugaat apuutereerpata, Mittarfeqarfinnilu piginnittut, tassa Naalakkersuisut peqatigalugit oqaluuserineqareerpata isummerfigineqareerpatalu Mittarfeqarfinniit aatsaat oqaaseqartoqarusuppoq.
- Piniartut, aalisartut nunaqarfimmilu najugallit oqaloqatigerusoqaagut. Taarsiiffigitinnissamut avatangiisinullu mingutsitsinermut tunngatillugu naalaarusuppagut suleqataarusullutalu.
- Pisoq assut ilungersunartutut isigaarput, pinngortitamilu uumasunik inunnillu ajoqusiineq sapinngisarput tamaat annikinnerpaamiitinniarsaralugu.
AAMMA ATUARUK Naalakkersuisoq om olieudslip i Kulusuk: Det er alvorligt
