Kulusumi atuarfiup iluatsilluartup ilinniartitsissutaa
Kulusumi atuartut piginnaasaat qaffasissumiipput, pissutissaqarani atuanngitsoortarneq takussaanngiusarpoq aammalu nunaqarfinnit allani allaanerussutigaat soraarummeernissamut piareersaataasumik atuartitsisaramik. Qaqutigoorpoq taama iluatsilluartigisoqartarnera, taamaanneralu nassuiaruminartoq atuarfiup pisortaa oqarpoq.
- Siullermik ilinniartitsisut 80 procentii tikillugit ilinniarsimasuupput. Taakkualu immikkut piginnaasaat atorluarpavut. Aamma atortussatta artoriaannaanissaat qarasaasiallu ajunnginnissaat tamatta suleqatigiilluta isumagisarparput. Aammalu eqqissilluni sulinissamut meeqqallu toqqissisimanissamut perierfissaqarnissaq isumagisarparput, meeqqat taamaalillutik atuarnissamut kajunniassammata, Kulusumi Alivarpimmi pisortaq Lars-Peter Sterling oqaluttuarpoq.
Qanorliuna qulakkeerniartaraa ilinniartitsisut atorfinitsinneqartut sulissamut tulluartuunissaat aanmmalu suliassamik naammassinnissinnaanissaat?
- Aviisimi allattoqaannarsinnaanngilaq, Kululusummi atuarfigissaaqaagut, qaaniaritsi. Taamaaliorneq upperineqarunnanngilaq. Qinnuteqartut tikinnissat qulakkeerniarlugu oqaloqatigilluarneqartariaqarput. Tassami maani inuiaqatigiinnguupput 300-it misaannaannik inoqartoq, atuarfiup pisortaa oqarpoq.
Lars-Peter Sterlingilli Kulusumi ingerlalluarnerminnut ataqqinaat nammineq tigunianngilaa.
- Peqqutaagunarami, Kulusummi sulerusussuseqartoqarnera, allani takussaanngitsumik. Tassami tikinngikkallaramali taamaappoq. 2002-mi tikikkama maluginiakkama siulliit ilagaat, meeqqat eqqissillutik suliassatik suliarisaraat. Meeqqat atuarneq allartikkaangat nillianeq ajorput appasaqattarnerlu ajorlutik. Tassa uanga angusarinngilara, maaniuku taamaattut, Lars-Peter Sterling oqarpoq.
Kisianni Kulusumi Alivarpimmi ingerlalluarnermi misiittakkat atuarfinnit allanit iluaqutigineqassappata, taava atuarfiit pisortaasa ilinniarteqqinneqarnissaat aallartiffissaalluartoq, Lars-Peter Sterling isumaqarpoq. Nammineq misilittagaqarfigilluaramigit.
Tamannami pisariaqarsoraa kommunet allanngornerisa kingorna aqutsisut allannguuteqarsimammata.
- Maanna, atuarfinni ittuusut taarseraatereersimalerneranni, kommunit kattussussimalerneranni, takusinnaasakka naapertorlugit atuarfippassuarni ingerlalluarunnaaqqapput. Taamaammat pitsaassangaluarpoq, taamannak pikkorisaaqqikkaanni. Kisianni aningaasat maanna apeqqutaagunarput, Lars-Peter Sterling oqarpoq.
Naallu meeqqat atuarfiata aallunnissaa politikkikkut siunertaagaluartoq, Lars-Peter Sterlingip ilimaginngilaa, aningaasat pisariaqartinneqartut politikerinit immikoortinneqarumaartut:
- Naamik ilimaginngilara. Atuartitaanermut naalakkersuisup oqartarnera tusaagaanni, ilimagivallaanngilara ilorraap tungaanut ingerlasoqartoq. Imaassinnaavormi ajunngitsumik isumaqartoq - kisianni tamanna piffissap takutikkumaarpaa, Lars-Peter Sterling ilinniartitaanermut naalakkersuisoq Palle Christiansen pillugu oqarpoq.
