Kulusuk Midnight Sun Festival aningaasaliiffigineqarpoq

Kulusummi iluatsilluartumik Kulusuk Midnight Sun Festivalimik aaqqissuussinermut aamma Kulusummi Alivarpimmut nipilersuutinut nutaanut katillugit 175.000 koruuninik Kommuneqarfik Sermersooq tapiissuteqarpoq.
Allattoq Jette Andersen
aggustip 27-at 2012 07:45

Peqatigiiffik Kulusuk Midnight Sun Festival siullermeersumik imigassartaqanngitsumik festivaalimik aasaq manna juulip aqqarnannit 14-iat ilanngullugu Tasiilap nunaqarfiini inuusuttunut Kulusummi aaqqissuussivoq, Kulusumi Alivarpimmi atuarfiullu silataani tupersuarmi tusarnaartitsivimmi ingerlanneqartumik.

- Festivaali aanngajaarniutinik atuiffiunngivissoq inuusuttunit tigulluarneqaqaaq aappaagumullu taama pisoqaqqinnissaanut qilanaalereerput, peqatigiiffiup siulittaasua Tinka Ane Mikaelsen oqaluttuarpoq.

Kulusuk Midnight Sun Festival sammisaqartitsinernik tusarnaartitsinernillu imaqarpoq. Tamakkua ilaatigut nipilersoqatigiit Pamyuameersunit Karina Møllerimit Stephen Blanchettimillu, erinarsortartumit Aviaaja Lunholtimit qilaatersortartumillu Anda Kuitsemit ingerlanneqarput.

Aningaasaateqarfik Sermeq festivaalip aaqqissuunneqarneranut 75.000 koruunit tapiissutigai. Nipilersuutinut nutaanut siunissami festivaalinik aaqqissuussinerni atorneqartartussanut Peqqinneq Pitsaaliuinerlu pillugit Sullissivik 25.000 koruuninik aningaasaliivoq, Kulturimut Susassaqartitsinermullu Immikkoortortaq 25.000 koruuninik aningaasaliivoq kiisalu Atuarfeqarnermut Immikkoortortaq 50.000 koruuninik aningaasaliilluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq