Kulturpolitikki pillugu ulluni pingasuni isumasioqatigiinneq Katuam ullumi aallartippoq. Nunatta namminersornerulerneranit ukiuni 25-ni kingullerni kulturpolitikki isumasioqatigiit misissuataassavaat, taamatuttaaq kulturikkut immikkut suliniarfiit, soorlu Savalimmiut, Åland, samet nunaat nunarpullu qimerluuataarneqassallutik.
Nunani avannarlerni immikkuullarissumik kultureqarfiit suut avissaarutigaat suullu ataqatigiissutigaat ? Qanoq ililluni misilittakkat isumassarsiallu iluaqutigineqarsinnaappat ? Siunissami suleqatigiinnissamut periarfissat suuppat ?
Apeqqutit taakku isumasioqatigiittut nunanit sisamanit aggersut 70-it missaanniittut, tassaasut kulturpolitikkimik kulturimillu suliallit, oqaluuserisassaasa ilagaat.
Namminersornerullutik Oqartussat kulturpolitikki pillugu nutaamik nalunaarusiornissaq ukioq manna sulissutigilerpaat, ukiunut tulliuttunut iliuusissatut pilersaarusiornissaq siunertaralugu.