Kulturpolitikki ilusilersorneqassaaq

Piorsarsimassutsimut naalaakersuisoq Henriette Rasmussen oqarpoq ingammik nunatsinneersunit kulturpolitikki pillugu isumasiqatigiinnermi pissarsiaqarsimalluni. Henriette Rasmussenni kulturikkut politikki eqqumiitsuliornermullu politikki immikkoortinneqarsinnaanerat pissutsinik erseqqinnerulersitsissasoq. Henriette Rasmussenip nassuerutigaa nunani avannarlerni nunat mikinerusut aningaasarissaarmata kulturimut akissaqartarmata, nunatsinnili nuna angisuumi kulturimut aningaasalersuiniarneq ukiuni arlalinni ajornartorsiutaammat iliuuseqarfiginiarneqartariaqartoq. Nunatsinnit peqataasunit oqariartuutinik pissarsilluarnerarpoq. Kulturikkut politikkiliornissamut suna amigaataanersoq oqariartuutigineqarpoq.

Namminersornerullutik Oqartussat kulturpolitikki pillugu nutaamik nalunaarusiornissaq ukioq manna sulissutigilerpaat, ukiunut tulliuttunut iliuusissatut pilersaarusiornissaq siunertaralugu. Ulluni marlunni isumasioqatigiinnermi oqariartuutit nalunaarusiornissamut aamma najoqqutaaqataajumaartut naalakkersuisup ilanngullugu oqaatigaa.