Kulturitoqaq inooriaaserlu nutaaq aporaakkaangata ajornartorsiortoqartarpoq

Ilaqutariinnermut Peqqinnissamullu Naalakkersuisoqarfik Tunumi ajornartorsiutit aaqqiivigineqarnissaannut atugassanik aningaasanik 3,1 mio. koruuninik aasaq manna tapiiffigineqarpoq. Maannalu suliniutit tamakku ingerlaleruttorput, soorlu psykologit marluk katsorsaatikkiartorneqarlutik, imerajuttunut katsorsaasoqarluni, ilaqutariinnut højskolertoqarluni taamatuttaaq imminortarneq pillugu akiuiniarnernik iliuuseqartoqarluni. Ullormiilli ullormut ajornartorsiutit aaqqinneqarsinnaanngitsut inuiaqatigiit pillugit ilinniagartooq oqarpoq.
oktobarip 31-at 2008 15:34

- Nunarsuarmi nutaajunngilaq inooriaatsitoqqat nutaallu aporaanneranni ajornartorsiutit takkuttarnerat tassani aamma imigassamik atuineq ilaasorujussuuvoq, Aviâja Egede Lynge oqarpoq.

Taanna nangilluni nassuiaavoq taamani Danmarkimi naasorissaasoqarnermiit suliffissuaqarnermut ikaarsaariartoqalermat ajornartorsiut tamanna atugaasimaqisoq.

- Kalaallit imerajunnerarlugit isiginiarneqartartorujussuupput kisianni ineriartornermi ajoraluartumik tamakku aqqusaagassaasartutut nunani allaninngaanniit nalunnginneqareerput, oqarpoq.

Aviâja Egede Lynge aamma erseqqissaavoq illoqarfiit ilaannut qaammarsaajartortoqassatillugu inunnut tikitassanut qaammarsaassutiginiagaq tulluartuusariaqartoq. Assersuutigalugu Nuummi Tunumilu katsorsaassutitut atorneqartoq Upernavimmi nunaqarfiit ilaannut atussallugu tulluartuunersoq apeqquserneqarsinnaasoq inuit illoqarfimmilu pissutsit assigiinngitsuunerat pissutaalluni. Kiallu isaanik isigalugu periuseq taanna suliaanersoq apeqqutaalluni.

Aviâja Egede Lynge nangilluni nassuiaavortaaq kalaallit qangaaniilli inuiaqatigiittut ataatsimuussusermik pigisaqartuusut, ataatsimuussuserlu taanna allaaninngorluni ullutsinni atorneqartartoq.

- Inuiaqatigiinnitta qangaaniilli aallaavigivaa kollektiviulluta tassa ataatsimoornermik inooriaaseqarluta, ilaqutariit qanittuupput gruppekkaarluta inuulluta, ineriartornitsinni inooriaaserput allanngortorujussuuvoq, kisianni taanna ataatsimoorneq uagutsinnut suli pingaartorujussuuvoq, imatut paasillugu kulturerput allanngoriartoraluartoq kisianni suli kalaallit akornatsinni kulturitsinniittorujussuuvoq kollektiviorusussusermik pigisaqarneq tassa ataatsimoorusunneq, imernerlu aamma kollektiviusorujussuugami tassa ataatsimoornermik pilersitsisarami, taama oqarpoq Skotlandimi Socialatropologitut ilinniarsimasoq Aviâja Egede Lynge.

Taanna aamma oqarpoq ullutsinnimi isornartorsiuinerujussuaq atugaasorujussuummat

kalaallit kalaaleqatiminnut avataaneersullu nunatsinnittut kalaallinut kaammattuinerusariaqalersut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq