Kulturissinnik avammut tuniniaaniaritsi
Kalaallit kulturiat allatulli avammut tuniniarneqarsinnaavoq, isiginnaartitsisartoq danskeq Jens Arentzen Nuummi oqalugiaqqammersoq oqarpoq.
Kulturi aningaasarsiutaalluarsinnaavoq – iluatsilluassappallu aningaasaliisoqartariaqarpoq nutaanillu isumassarsiortoqartariaqarluni.
- Massakkut kulturimik suliaqartut ataqqivakka sorpassuaqarmalli tassungaannaq killinnasi ingerlaqqittariaqarpusi. Danskit filmiliortartut Kalaallit Nunaannukarlutik filmilioriartortartut naammaleqaat, taamaattumik kalaallit kajumissaarpassi nammineq ullutsinnut naleqquttunngorlugit filmiliortarnissassinnut, atuakkiortarnissassinnut, nipilersuuserlugulu aliikkusersuisarnissassinnut. Atuakkiornermik, filmiliornermik qitinnermillu ilinniarfiit Kalaallit Nunaanniittut, naak ? Naak inuit tamakku oqaluttuallaqqissut ? Isumaqarpunga tamakku pilersiortorneqarnissaanut suliniuteqartoqartariaqartoq. Iluatsittumimmi suliniutigineqarpata aningaasarpassuarnik kaaviiaartitsisoqarsinnaavoq, Jens Arentzen oqarpoq.
Taanna aperaarput aliikkutassiat tamakku inuit 55.000-iinnaat sumut atussagamikkik, ima akivoq:
- Oqaluttuaatitoqqasi inuunissinniluunniit misigisartakkasi oqaluttuarisinnaasuugussigik filmiliareriarlugit avammut tuniniarsinnaalluarpasi. Kalaallit Nunaanni oqaluttuassarpassuaqartoq nalunngilara. Oqaatiginngitsoorusunngilara una; kalaallit assut pinnersuupput, Jens Arentzen oqarpoq.
Afrikami nunat arlallit nunanit allanit tapiissutit naalakkersuisullu aningaasaliisoreriarlugit kulturitik aallaavigalugit avammut tuniniaapput.
- Kinguussaarusunngikkussi taamaaliorsinnaanerlusi eqqarsaatiginiarsiuk aamma aningaasarpassuit isertitarineqarsinnaalissagaluarput, Jens Arentzen naggasiivoq.
