Kulturisiornissaq angumerinngitsoorpaat

Nuummi siorna ullormi tassanerpiaq, tassa septembarip 28-anni inuppaalussuit akerliussutsimik takutitsillutik, kulturi inatsisartut ataatsimiittarfiata silataani iliverpaat.

Kulturimik ilisinermiit ukioq qaangiutileriannguallartoq Naalakkersuisut ulloq taannarpiaq kalaallit Nunaanni kultursiorfiussasoq suaarutigaat 1,8 millionit koruuninillu aningaasartaliillutik. Susoqanngilarli, kulturisiornissamut sapaatip akunnerinnanngortorlu aatsaat kommunit ilisimatinneqarmata. Kommunillu radioavisimit sianerfigisatta tamarmik oqaatigaat aaqqissuussinissamut arlaannartilluunniit piffissaqarsimanngitsoq. Taanaannaanngilarli. Kommunit ilaasa kulturimut immikkut aningaasaliiffigineqarnertik tupassutigisimavaat, Namminersornerullutik Oqartussanit aningaasat kommuninut nakkartinneqarsimammata ilisimatitsissutiginagulu septemberip 28-ani atugassatut naatsorsuussaasut. –Sapaatip akunnera kingulleq aningaasannariataarpugut, septemberilli 28-at taaneqanngimmat ilisimasimanngilarput sumut atugassatsinnik pajunneqarnerluta, taama oqarpoq Nanortalimmi Kulturimut immikkoortortaqarfimmi pisortaq Jens Korniliussen nangipporlu: atussaqqaarpagulli pilersaarusioqqaartariaqarpugulli.

Naalakkersuisulli nalusimannginnamikku kingusinaarpallaarlutik kommunit oqarfigisimavaat aningaasat ukioq naatinnagu atuinnarumaaraat. Nuup kommuneani fritidsinspektøri Jørgen Benjaminsen oqarpoq ukiap ingerlanerani kulturisiortitsinissartik naatsorsuutigingitsik. – Pisussat qaleriiaaqqunagit piffissaqarusuppugut pilersaarusiornissatsinnut, isumaqarpungali eqqumiitsuliortut atugarissaarnerulaalernissaannut aningaasaliissutigineqartut atorneqartariaqaraluartut, Jørgen Benjaminsen oqarpoq.

Narsami oktobarip 25-anni kulturisiorniarpalupput . Paamiuni oktobariup 20-anni. Qasigiannguanilu novembarip 15-anni kulturisiornissaq siunniunneqarpoq.