Kulturini assigiinngitsuni imminut toquttarnermik pinaveersaartitsiniarneq

Suliniaqatigiiffiup imminut toquttarnerup pinaveersaartinniarneqarneranik suliniuteqartup 'Den Internationale Sammenslutning for Selvmordsforebyggelse'-p suliniuteqarneratigut Naalagaaffiit Peqatigiit Peqqinnissakkut suliniaqatigiiffiat WHO suleqatigalugu pinaveersaartitsiniarneq malunnartinneqartarpoq.

Sammisani ukioq manna qulequtaritinneqarpoq ”Kulturini assigiinngitsuni Imminut toquttarnermik pinaveersaartitsiniarneq”.

Nunatsinni illoqarfinni nunaqarfinnilu assigiinngitsuni ulloq assigiinngitsutigut malunnartinniarneqassaaq.

Soorlu Nanortalimmi meeqqat inuusuttullu klubbimeersut, kollegiameersut aamma Piareersarfimmeersut peqataarusuttullu allat eqqaassutissamik uleersissapput, kiisalu unnukkut aaqqissuussisoqassalluni.

Nunatsinni angutit inuusuttut 15-it 19-illu akornanni ukiullit imminut toquttartut amerlanerpaapput.

Naggueqatitta akornanni inuusuttut imminnut toquttartut, Canadap kujasinnerusortaani imminut toquttartunut naleqqiullugit, aqqaneq marloriaammik amerlanerusut, Canadami ilanngutassiortorput Marianne Stenbæk tusarliiivoq.

Naggueqatigut Inuit Canadamiittut Canadami Ottawami inatsisartut ataatsimiittarfiata saavani imminut toquttarnerup pinaveersaartinneqarneranut ulloqartitsineq ullumikkut malunnartissavaat.

Imminut toquttarneq naggueqatigiit Inuit inuusuttaasa toqussutiginerpaasarpaat.

Imminut toquttartut tassaanerullutik angutit inuusuttut 14-init 22-nut ukiullit.

Tamanna pinaveersaartinniarlugu suliniutit arlaqartut Canadap issittortaani nunaqarfinni illoqarfinnilu sulinitigineqaleruttorput.

Ottawami inatsisartut ataatsimiittarfiata silataani naggueqatigiit Inuit inuusuttaasa peqatigiiffianni siulittaasoq Jessie Mike oqalugiarniarpoq, erinarsortartorlu ilisimaneqarluartoq Susan Aglukark erinarsorniartoq, Canadami ilanngutassiortorput Marianne Stenbæk nalunaarpoq.