Kulturimut aningaasaateqarfik agguaavoq

Nunani Avannarlerni kultureqarnermut 4 millionit koruunit maanna agguaanneqarsimalerput.
Allattoq Najaaraq Egede
apriilip 08-at 2010 10:51

Aningaasat ukioq-manna atorneqartussatut akuersissutigineqarsimasut siulliit Nunani Avannarlerni kultureqarnermut aningaasaateqarfiup agguaateqaqqammerpai, Nunanilu Avannarlerni suliniuteqartunut 65-inut tamanna iluaqutaassaqaaq - soorlu Finlandimiut suliniutaat: Kalaallit Nunaanni kristumiussuseq.

Kristumiussutsip Kalaallit Nunaanni eqqunneqarneranit ullumimut inunnut sunniutai saqqummersinneqassapput, saqqummersitsisuussalluni Issittumi katersugaasivik Nanoq Finlandimiittoq, Nunat Avannarliit kultureqarnermut aningaasaateqarfianit 50.000 koruuninik taperneqartoq.

Saqqummersitsinerup siunertaraa, kalaallit inuillu kulturiata finlandimiunut paasissutiginissaa. Katersugaasiviup aamma anguniarpaa finlandimiunut paasissutigissallugu, Kalaallit Nunaanni Finlandimilu innuttaasut pinngortitaq qanillugu inuusut kristumiussutsimit qanoq sunnerneqarsimanerat.

Pilersaarutit malillugit katersugaasivik Nanoq maajip 21-ianiit septembarip 30-anut saqqummersitsissaaq.

Nanoq Fäboda-miippoq Finlandip ilaani Jakobstadimiilluni. Kalaallit Nunaanni kristumiussuseq pillugu saqqummersitsineq sioqqullugu ilaatigut atuakkiortoq eqqumiitsuliortorlu Kristian Aaju Olsen peqataasoralugu isumasioqatigiittoqassaaq. Saqqummersitsinerullu ammarnerani Ramus Lyberth tusarnaartitsissaaq.

Nunat avannarliit Kulturimut aningaasaateqarfiata sapinngisamik nunat avannarliit tallimat nunallu namminersulersimasut Kalaallit Nunaat, Savalimmiut aamma Åland tamaasa suliniutinut kulturimut tunngasunut tapiiffiginiartarpai.