Kulturimik tunngavilimmik suliniutillit nersornaaserpaat
Kajumissaaserneqartussat pingajuat, Tasiilami decembarimi tunniunneqassaaq. Taama kajumissaaserneqartussaaq maannamut isertuussaagallarpoq.Innuttaasut najukkani inuiaqatigiinnut nukittorsaataasumik inuussutissarsiornikkut,
kulturikkut inooqataanikkullu suliniuteqartut nutaaliortullu kajumissaaserneqartarnissaat siunertarineqarpoq.
Ilusilersuisartoq Lis Stender, nutaaliorluni kalaalerpaluttunik ilusilersuinermik ineriartortitsinini pillugu kajumissaaserneqarpoq. Ilaatigut ulluinnarni atorneqartartunik soorlu nerinermi atortunik, allarutinik aamma oqorutit qaliinik ilusilersuinini pillugit kajmissaaserneqarpoq. Lis Stender inuussutissarsiornikkut ineriartortinneqarsinnaasumik pilersitsinermigut kajumissaaserneqarpoq.
Kajumissaaserneqartup aapparaa Nunatta Atuagaateqarfiata pisortaa Elisa Jeremiassen, unnummik kulturisorfimmik pilersitseqataanini pillugu kajumissaaserneqartoq. Tamannami ileqquulersimavoq illoqarfimmik ataatsimoortitseqataasoq Nunattalu sinneranut siaruaassimasoq.
Kajumissaasiineq tunissummik aamma 15.000 koruuninik aningaasartaqarpoq.
Oqaatigineqareersutut kajumissaaserneqartut pingajuat Tasiilami decembarimi kajumissaaserneqassaaq. Kinaanersorlu taamanikkut paasinarsissaaq.