Kulturikkut unnussiorneq katersuiniarnermi atorluarneqarpoq
Kalaallit Røde Korsiata kisitsinerit suli naammassivinngilaat. Kalaallit Røde Korsianni allaffiup pisortaa, Kirsten Mortensen, ullaap tungaa aningaaserivimmiissimalluni, paasitippaatigut aningaasat kontomut iki
neqarsimasut maannamut katillugit 324.241 koruuniusut. Aamma 18.936 koruunit Nuummi kulturikkut unnussiornermi Kalaallit Røde Korsiata ilaasortaannit katersorneqarsimapput.
Kalaallit Røde korsiat peqartigalugu, tallimanngormat toqqaannartumik Pulaarfik aallkaatinneqarmat aningasat 360.000 koruunit katersorneqarput. Pulaarfimmi pulaartitsisoq, Sivert Olsen ima oqarpoq:
- Uanga nammineerlunga tupaallaatigaara nalunaaqquttap akunnerata ataatsip ingerlanerinnaani aningaasanik taama amerlatigisunik katersisinnaagatta, tamannalu nuannerlunilu tupaallannarpoq.
Aningaasat Pulaarfimmi katersorneqartut aningaaserivimmut suli apuussimanngitsut Kalaallit Røde Korsip oqaatigaa. Aamma Ilulissani Røde Korsip immikkoortortaqarfiata katersuinermi iluatsitsisimasoq, siulittaasup Rakel Reimer Jensenip oqaatigaa:
- Inuit tapiilluarsimapput, Ilulissani Røde Korsip atornikuerniarfiani tuniniaagaatsiarpugut. Uangut tapiissutigut ilanngullugit 10.000it sinnerlugit arfininngormat isertinneqarsimapput.
Sinerissami Kalaallit Røde Korsiata immikkoortortaqarfii, illoqarfinni ukunani: Qaqortoq, Narsaq, Narsarsuaq, Sisimiut, Ilulissat Qasigiannguillu sapaatiuppat 31. januaari aallartittumik katersuinialersussaapput.
