Assi: Angela Gzowski Photography

Kulturikkut tapiissutit: Kalaallit filmiliaat 1,5 millioninik aningaasaliiffigineqartoq

Kalaallit filmiliaat, atuakkiaat tusarnaartitsinerillu kulturikkut ukiaq manna tapiissuteqarfigineqartut ilagaat. Assigiinngisitaarnerallu Ane Lone Baggerip nuannaarutigaa.

Kultureqarnermut naalakkersuisoq Ane Lone Bagger kulturikkut sulianut assigiinngitsunut 41-nut katillugit 3,5 millionit koruuninik aningaasaleeqqammerpoq.

Kulturikkut sulianut aningaasaliissutit ataatsimut isigalugu immikkoortunut sisamanut immikkoortiterneqarput, tassa kulturimut aningaasaliissutit, filmiliornermik ingerlataqartunut aningaasaliissutit, atuakkanut kalaallisoortunut aningaasaliissutit kiisalu kulturimik sulialinnut aningaasaliissutit.

Kulturimut aningaasaliissutit ilaannik tunineqartut ilaat tassaapput Josef Lund Josefsen aamma Kuunu Berthelsen. Taakku illoqarfinni assigiinngitsuni Juullerpalaartunik tusarnaartitsinissaat aningaasaliiffigineqarpoq.

Filmiliornermik ingerlatsinermi pilersaarutit aqqanillit katillugit 1.552.000 koruuninik aningaasaliiffigineqarput.

AAMMA ATUARUK Marc Fussing Rosbach Innersuarmik nersornaaserneqartoq

Anorak Filmip filmiliaa Twice Colonized 400.000 koruuninik aningaasaliiffigineqarpoq, soorlu aamma Marc Fussing Rosbachip filmiliaata "Akornatsinniittut - Kiinnappalik"-p naammassineqarnissaanut aningaasaliisoqartoq.

Baggerip kulturikkut suliaqarnerit nuannaarutigai

Atuakkat kalaallisut allatat assigiinngitsut Naalakkersuisunit aamma aningaasaliiffigineqarput, assersuutigalugu Ole Brandtip atuakkiaa "Taseraq Pingajuallu" saqqummerseqqinneqartussaavoq, tassungalu 165.000 koruuninik aningaasaliisoqarluni.

Kulturimik sulialinnut eqqumiitsuliornikkut suliaqartunut qulinut taassuma saniatigut aningaasaliisoqarpoq, Dorthe Kjeldsenip nunarsuaq kaajallallugu atuakkiornissaanut ilaatigut aningaasaliisoqarluni.

Piukkunnartorpassuarnik qinnuteqartoqarnera, Kultureqarnermut naalakkersuisup Ane Lone Baggerip nuannaarutigaa:

- Nuannaarutigaara piukkunnartorpassuarnik, tusarnaartitsinerniit sinarissami isiginnaartsinerniillu fimiliornermut atuakkanillu saqqummersitsinissamut, qinnuteqartoqarmat. Inuiaqatigiinni kulturikkut eqeersimaartoqarneranik ersersitsivoq, Ane Lone Bagger oqarpoq.

Kulturikkut suliniutit suut aningaasaliiffigineqarnersut, nittartakkatsinni KNR.gl-imi alakkartersinnaavat.

Kulturikkut suliniutit tapiissuteqarfigineqartut allattorsimaffiat uani takusinnaavat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat