Kulturikkut siunnersuisoqatigiit aallarteqqipput

Nunatsinni kulturikkut siunnersuisoqatigiit 2004-imi unitsinneqartoq, Kultureqarnermut naalakkersuisumit Doris Jakobsen-imit aallarteqqinneqarpoq. Siunnersuisoqatigiinni ilaasortat arfiniliusut peqatigiiffinnit kattuffinnit soqutigisaqaqatigiinniillu toqqarneqarput, taakkua saniatigut ilaasortat marluk Kultureqarnermut naalakkersuisup toqqagarai.

Sapaatip akunnera kingulleq naammat Siunnersuisoqatigiit siullermeerlutik Ilulissani ataatsimiippput.

Siunnersuisoqatigiinni ilaasortat tassaapput, Kalaallit Atuakkiortunit Ane Marie B. Pedersen, Isiginnaartitsisartut peqatigiiffiannit Bendo Schmidt, , Filmiliortartunit Assilissanit Laila Hansen, Eqqumiitsuliortut peqatigiiffiannit KIMIT-mit Buuti Pedersen, Peter Davidsen nunatsinni erinarsoqatigiit kattuffiannit KNEK-imit kiisalu Ulf Fleischer nipilersornermik ingerlataqartut sinnerlugit ilaasortaatinneqarallartoq.

Kultureqarnermut naalakkersuisup Doris Jakobsen-ip Kultureqarnermut siunnersuisoqatigiinni ilaasortatut toqqarpai, Inge Olsvig Brandt siulittaasutut aammalu Simon Løvstrøm, Mooqqu, ilaasortatut.

Siunnersuisoqatigiit ukiuni tulliuttuni pingasuni suliassaasa ilagaat, nunatsinni isiginnaartitsisartoqarnerup inatsisiliuuneqarnissaa, aammalu Naalakkersuisut kulturikkut politikki pillugu nalunaarusiaata nalilersoqqinneqarnissaa, taanna kingullermik 2004-imi nutarterneqarsimavoq.