Kulturikkut pikialaartitsinerni aamma ujaminnatsinniarneqarput
AWG2016-imik aaqqissuisut Nuummi eqqumiitsuliortuni taamaammat isumaqatigiissusiorput, kulturikkut pikialaartitsisut "Kulturmedaljon"-itut taasamik tunineqartarnissaat pillugu 100-nik medaljoniliornissaat isumaqatigiissutigisimallugu.
Kulturmedaljoni eqqumiitsuliortumit Camilla Nielsenimit suliarineqarsimavoq, Nuummi sanaluttartut marluk Palle Møller Peter Harderilu matumani suleqatigineqarlutik.
Qilaat ujamiliami assiitigineqarpoq, kanngussallu manngertoq ujamiliornermi atorneqarluni. Eqqumiitsuliortullu piniartunit ikiorneqarnissaminnik kissaateqarput:
- Tuttunniat patruuninik kanngussammik manngertunik sanaanik katerseqatigissagaatigut neriuutigaarput, atoriikkaminnik katersinissaat neriutigalutigu, Peter Harder oqarpoq, nangillunilu:
- Piniartartut taamaaliornikkut ujamiliornitsinnut peqataassapput, kulturimik pikialaartitsinerni peqataasorpassuit ujaminnatsinneqarsinnaanissaat aamma qulakkeerneqarsinnaassalluni, Peter Harder oqarpoq.
Patruuninik atoriikkanut igitsiffissat Nuummi sumiiffinni arlalinni inissinneqassapput, soorlu Orsiiviup eqqaani, sakkussanillu tuniniaaviusut eqqaanni.
